పుట:రాధికాసాంత్వనము (ముద్దుపళని).pdf/106

వికీసోర్స్ నుండి
ఈ పుట అచ్చుదిద్దబడ్డది

తృతీయాశ్వాసము 89

కాటుక సమయించి కలపము ల్తెమలించి
సరసవాసనకట్టు సంఘటించి
దుగరైక తొలగించి జిగిచల్వ నటు డించి
మాసినచీర సమ్మతి ధరించి
తే. [1]వెతల మితి మీఱి వేసారి విధిని దూఱి
యలమటలఁ దారి జీవపుటాస లాఱి
పడకయిలు చేరి కంకటిపైని జేరి
పొరలె మరు లూరి చిలువరాపొలఁతిదారి. 57

చ. పొరలును గొట్టుకాడు వెతఁ బొందును హా యనుఁ జింత నొందు ని
వ్వెఱపడు వాడు లోఁ గుములు వెఱ్ఱిగఁ బ్రేలు విరాళిఁ జెందు బల్
సొరుగును సొమ్మసిల్లు మదిఁ జొక్కు వితా కవు మారు దూఱు నా
తరుణిని గేరు మారుకొను తన్ హరి దూఱును బెట్టు మూర్ఛిలున్. 58

చ. ఉలుకును వెచ్చ నూర్చుఁ గడునుస్సు రనుం దల యూఁచు లేచు లోఁ
గలగఁబడున్ దిగుల్పడును గానిపను ల్తలపోయు వేసరుం
గలవల మందుఁ గల్గొను వికావిక నవ్వు భయంబుఁ జెందుఁ గ
న్గొలఁకుల నీరు నించు మదిఁ గొంకుఁ దలంకు వడంకు నెంతయున్. 59

ఉ. రా యను వింత పుట్టినది రా యనుఁ జూతువు గాని వేడ్క లే
రా యను మేలువార్త వినురా యను నావల పింత చేసె నౌ
రాయను నిన్ను దూఱ నగరా యను నంతియె కాదు కాని పో
రా యను దానిపొందె కనరా యను హా యదుశేఖరా యనున్. 60

సీ. ఏయెడ నాఱొమ్ముఁ బాయనివీణ నే
పాటలాధర గోట మీటునొక్కొ
నామాట మీరక నలు వొందుకీర మే
నెలఁతముంజేతిపై నిలుచునొక్కొ

  1. యెదను తమి [మూ.]