పుట:రాజశేఖరవిలాసము (కూచిమంచి తిమ్మన).pdf/77

⁠

సంపెఁగదండఁ జుట్టె నొకసారసనేత్ర నృపాలపత్నికిన్.

⁠

ఉ⁠

ముద్దులగుమ్మ యోర్తుచెలి ముందర గొప్పమెఱుంగుటద్దముం దద్దయు నిల్పెనొక్కవనితామణి కస్తురిబొట్టు మోమునం దిద్దెఁ బడంతియోర్తు సౌరిదిన్మకరీమయరేఖ లెంతయు న్ముద్దియతళ్కుఁజెక్కులను మోహనలీల లిఖించె నేర్పునన్.

⁠

చ.⁠

కలువలఁ గేరు చంద్రముఖికన్గవ నొక్కవధూలలామ చె ల్వలరఁగఁ గజ్జలం బిడియె నబ్జనిభాననయోర్తు వేడ్క రం జిలఁగను నీలవేణిజిగిసిబ్బెపుగుబ్బలపైని జొబ్బిలం గలవ మలందె నంచితసుగంధయుతంబుగఁ జిత్రవైఖరిన్.

⁠

సీ.⁠

చారుముక్తాహారవారము ల్గళమున నించె వేడుక నొక్కమించుబోఁడి సౌవర్ణకర్ణభూషణము లందము మీఱఁ దగిలించె నొకశీతధామవదన ఘనమైనపచ్చలకడియంబు లిరవుగాఁ బెట్టెఁ జేతుల నొక్కబిసరుహాక్షి కమనీయరత్నసంఘటితమై వెలుగొందు మొలనూ లిడియె నొక్కమోహనాంగి పాదముల నందియలు బెట్టె రామయొకతె | నుదుటఁ జేర్చుక్క నిడె నొక్కసుదతి మఱియుఁ బేరుగల భూషణములెల్లఁ బ్రేమ నిడిరి | రమణు లింపార నప్పు డారాజసతికి.

⁠

వ.⁠

ఇ ట్లగణ్యశృంగారధారిణియై యనంతరంబ.

⁠

సీ.⁠

ఘనసారచందనకస్తూరికాముఖ్యదివ్యగంధంబులు దిశలఁ బర్వఁ గింకిణీనూపురక్రేంకారనాదము ల్కడునింపు మీఱ నొక్కటఁ జెలంగ రత్నసంఘటితమై తనరారు నవ్యకాంచనభూషణములు మెఱయ భూరికుంతలబంధభారంబుచే మించి మందమై నడకలు సందడింపఁ బీనకుచకుంభయుగళంబు పేర్మిఁ బొదల | లలితశృంగారలీలావిలాసములను వాసి మీఱంగ నమ్మహీవరునికడకు | నింతి యరుదెంచె మదనునిదంతి యనఁగ.

⁠

క.⁠

ఈరీతి నతులతరశృం | గారము దనరార వారకాంతయఁబోలెం జేరి తనయెదుట నిలిచిన | నారీమణిఁ జూచిధరణినాథుఁడు వేఁడ్కన్.

⁠

క.⁠

ఈలలనారత్నం బీ | నీలాలక యీవినిద్రనీరజముఖి యీ లీలావతి తగునౌఁ దన | పాలిఁటిజంగమున కంచుఁ బ్రణుతించి వెసన్.

⁠

గీ.⁠

భూమివిభుఁ డంతఁ దనయంతిపురము వెడలి | నెలతఁ దోడ్కొని యరుగుచో నింగినుండి చూచి సురకాంత లెంతయుచోద్య మంది | యెల్లవారును దమలోన నిట్టు లనిరి.

⁠