పుట:రాజశేఖరవిలాసము (కూచిమంచి తిమ్మన).pdf/39

22

ప్రథమాశ్వాసము

క.⁠

అడిగినవస్తు వొకింతయుఁ | దడయక యాక్షణమునందె తాత్పర్యముతోఁ గడువడి నొసఁగుచు భూపతి | పుడమిన్ బ్రతివాసరంబు బ్రోది యొనర్పన్.

⁠

క.⁠

జంగంబులెల్ల నచట భు | జంగమరాజాంగదుని వెసం గొల్చుచునో జంగములై వసియించిరి | బంగరపుమఠంబులందు భాసురలీలన్.

⁠

వ.⁠

ఈక్రమంబున నద్ధరాధీశుం డతులితధర్మమార్గప్రచారుండై ప్రతిదినజంగమారాధ న చేయుచుండె నని సూతుం డెఱింగించిన నైమిశారణ్య మహామును లఁటమీదికథా వృత్తాంతం బెట్లని యడుగుటయును.

⁠

ఉ.⁠

హారతుషారహీరశరదభ్రనిశాకరతారకాబ్జడిం డీరమరాళపారదపటీరవియత్తటినీసితాభ్రమం దారసురేంద్రనాగకలధౌతసుధారసనన్నిభోజ్వలా కారలసద్విహారసుమకాండవిదార యుదారశంకరా.

⁠

స్రగ్విణి.⁠

చారుకారుణ్యవిస్తారతారేశకో | టీరదైత్యేభకంఠీరవేంద్రాదిబృం దారకానీకమందారసత్యవ్రతా | చారగోరాజసంచార గౌరీశ్వరా.

⁠

తురగవల్గనము.⁠

ధరణిధరవరశరణచిరశుభదాయకా హరిసాయకా తరణిశశిశుచిశయనదురితవిదారణాలయకారణా పరమపురుష హరిహయవినుత పురభంజనా మునిరంజనా హర గరళగళ మదదనుజభయంకరా జయశంకరా.

⁠

గద్య.
ఇది శ్రీమత్కుక్కుటేశ్వరవరప్రసాదలబ్ధకవితాసామ్రాజ్యధురంధర ఘన
యశోబంధుర కౌండిన్యసగోత్రపవిత్ర కూచిమంచి గంగనామాత్యపుత్ర
బుధజనవిధేయ తిమ్మయనామధేయప్రణీతంబైన రాజశేఖరవిలా
సంబను కావ్యంబునందుఁ బ్రథమాశ్వాసము.