పుట:రాఘవపాండవీయము (పింగళి సూరన).pdf/2

ఉపోద్ఘాతము

ఇమ్మహాకావ్యమును నిఖిలసూరిలోకాంగీకారతరంగితకవిత్వచాతుర్యధుర్యుం డైనపింగలి సూరనార్యుఁడు రచియించెను. ఈమహాకవి నియోగిబ్రాహ్మణుఁడు. యాజుషశాఖాధ్యయనపరుఁడు, గౌతమగోత్రుఁడు. ఆపస్తంబసూత్రుఁడు. అమరనార్యునకును అబ్బమ్మకును బుత్త్రుఁడు. సూరనార్యునకుఁ బౌత్త్రుఁడు. భావనామాత్యునకు దౌహిత్రుఁడు. ఇతనికిఁ దమ్ము లమలన యెఱ్ఱన యనువార లిరువురు గలరు. ఈయర్థము రాఘవపాండవీయకళాపూర్ణోదయములలోని

సీ.⁠

"శోభితాపస్తంబసూత్రు గౌతమగోత్రు సుచరిత్రుఁ బింగలి సూరసుకవి పౌత్త్రు నన్నపపతిభావనదౌహిత్రు నమరధీమణికి నబ్బమకుఁ బుత్త్రు ననుజన్ము లైనట్టియమలన యెఱనార్యు లతిభక్తి సేయంగ నలరువాని సత్కావ్యరచనావిశారదుం డగువాని సూరననామవిశ్రుతుని నన్ను.”

⁠

ఆ 1. ప 9.

అనుపద్యపుసీసపాదములను బ్రభావతీప్రద్యుమ్నములోని

క.⁠

“గౌతమగోత్రునకును బ్ర, ఖ్యాతాపస్తంబసూత్రయాజుషశాఖా ధీతిపవిత్రునకును లో, కాతిగవశితాజితాంతరామిత్త్రునకున్.”

⁠

అనుపద్యమునను స్పష్టమయ్యెడు.

ఈవంశమువారికిఁ బింగలి యనుగ్రామమున నివసించిన కారణమునఁ బింగలివా రనిపేరు వచ్చినట్లు ప్రభావతీప్రద్యుమ్నములోని

మ.⁠

"తరముల్ నాల్గయి దెందు నెందునగుఁ దత్తద్గ్రామనామంబులం బరఁగున్ వంశము లెల్లఁ బూర్వపునిజప్రఖ్యాతి మాయంగ నే మరుదో పింగలినామ మందుఁ జిరకాలావాసు లై యున్నసు స్థిరతం గోకనమంత్రివంశజులకుం జెన్నొందు మి న్నందుచున్.”

⁠

అనుపద్యమువలనం దెలియవచ్చెడు. పింగలి యనుగ్రామము కృష్ణా