| |
వేఁడు మొక్కవరము, విభునిజీవిత మొక్క
టియును దప్ప; నేదియైన [1]నొండు.”
| 224
|
సావిత్రి యమునివలన నభీష్టవరంబులు వడయుట
| చ. |
అనవుడు మద్రరాజసుత ప్రాంజలి యై సమవర్తితోడ ని
ట్లను; “రిపుకోటిచే నపజయంబును బొంది వనాంతరంబునం
దనవరత[2]వ్రతాభిరతుఁ డైన మహాత్ముఁడు సాళ్వభూవిభుం
డనఘుఁడు లబ్ధచక్షుఁ డగునట్టులుగాఁ గరుణింపవే దయన్.”
| 225
|
| క. |
నావుడు “నట్టుల యయ్యెడు;
నీవిట రా[3]వలదు; మగుడు నెమ్మి” నని వెసం
బోవఁ దొడంగెను బితృపతి;
యావెలఁదియు నంత నిలువ కరిగెఁ బిఱుందన్.
| 226
|
| వ. |
ఇట్లు సని చని మఱియు ని ట్లనియె.
| 227
|
| చ. |
“ఎడపక వాఙ్మనఃక్రియల నేరికి [4]నె గ్గొనరింపఁ బూన; రె
య్యెడలను దీనులం గరుణ యేర్పడఁ బ్రోవన చూతు; రిచ్చుచోఁ
గడమ వడంగనీ కెదిరికాంక్షితముల్ దుదిముట్టఁ దీర్తు; రె
క్కుడు మదిఁ గూర్తు రాశ్రితులకున్; విను మిన్నియు నార్యధర్మముల్.
| 228
|
| క. |
నీవెఱుఁగని యది [5]యెయ్యది
దేవోత్తమ! ధర్మగతుల తెఱఁ గెల్ల భవ
ద్భావాధీన మగుటఁ గా
దే వెలసితి నీవు ధర్మదేవత యనఁగాన్.
| 229
|
| క. |
సమబుద్ధితోడఁ దత్త
త్సముచితకర్మఫల మఖిలజంతుతతులకున్
సమకూర్చుట, నీకయ్యెను
సమవర్తియనంగఁ బేరు జగదభినుత మై.
| 230
|
| క. |
యముఁ డండ్రు నిన్ను నార్యులు
యమియింపుదు భూతముల నెల్ల; న ట్లగుటఁ దగున్;
శమనుండ వైతి కల్మష
శమనంబునఁ జేసి నీవు జలజాప్తసుతా!”
| 231
|
| వ. |
అనినం బ్రేతపతి యాపుణ్యసతి కి ట్లనియె.
| 232
|
| క. |
“తృషితుఁ డగువాని బరిలఘు
తుషారతోయములు మోదితునిఁ జేయుగతిన్
హృషితాత్ముఁ జేసె ననుఁ గ
ల్మష[6]హరణములైన నీసమంజసఫణితుల్.
| 233
|
| వ. |
కావున సత్యవంతుని ప్రాణంబులు దక్కం దక్కినకోర్కి యెయ్యది యైనం జెప్పుము;
సఫలంబు సేసెద” ననిన సావిత్రి “దేవా! వైరులచేత సపహృతం బైన రాజ్యం
బెప్పటియట్ల [7]ద్యుమత్సేనుండు ప్రాపించునట్లుగా ననుగ్రహింపవే” యని
వేఁడుటయు వైవస్వతుం డట్ల యగునని పలికి యి ట్లనియె.
| 234
|
| ఆ. |
“వలదు నిలువు మింక; వదలక నీభక్తి
మగని కెక్కె; దుర్గమంపుఁ ద్రోవ
యిది; కృతంబు లయ్యె [8]నెల్లయు; నీవిట
వచ్చునెలవు లేదు వనజనయన!”
| 235
|
| వ. |
అనిన నమ్మహాభాగ యతని కి ట్లనియె.
| 236
|
| క. |
“ధర్మాత్ములు దమ సలిపెడు
ధర్మక్రియ దప్ప రెట్టి దశలందును; మో
|
|
- ↑ నొకటి
- ↑ ప్రభీతియుతు...గరుణింపవే మదిన్
- ↑ వలవ దుడుగు
- ↑ హింస యొనర్పఁబూన
- ↑ గలదే
- ↑ రహితము
- ↑ ద్యమత్సేనునకుం గల్గునట్లుగా
- ↑ నెల్లవియును నిటు, ...వామనయన
