బ్రిటీష్‌రాజ్యతంత్రము
179
IV
బ్రిటిషు పార్లమెంటుయొక్క సర్వాధికారము
ప్రతిరాజ్యాంగములోను 'ప్రభుత' (Sovereignty) అను సర్వాధికారమే ప్రధానమగు విషయము. అన్ని స్వతంత్ర ప్రజాప్రభుత్వములందు ఈప్రభుత లేక సర్వాధికారము ప్రజలయందే యుండును. ఇది ప్రజలవలన ఎన్నుకొనబడిన ప్రజాప్రతినిధిసంస్థరూపము దాల్చును. ఈ సంస్థవలననే ప్రభుత్వశాఖ లన్నియు తమ యధికార సత్తాలను పొందును.
భారతదేశము బ్రిటీషు దీవుల అధికారమునకు లోబడిన పాలితరాజ్యము. అందువలన 'ప్రభుత' భారతదేశ ప్రజలయందు గాక బ్రిటీషువారి పార్లమెంటులోనే నెలకొనియున్నది. కాబట్టి మనదేశముయొక్క ప్రభుత్వము ఏ రూపముకలదై యుండవలెనో నిర్ణయించునది బ్రిటీషు పార్లమెంటే [1] మఱియు బ్రిటీషు పార్లమెంటువారే తమ మంత్రియగు ఇండియా రాజ్యాంగ కార్యదర్శిద్వారా భారతదేశ వ్యవహారముల పైన అదుపు ఆజ్ఞలను పైతనిఖీని చెలాయించుచుందురు. భారతదేశ పరిపాలనము యొక్క అన్ని ముఖములందును గూడ జోక్యము కలిగించుకొనుటకు ఇండియా రాజ్యాంగ కార్యదర్శికి అపరిమితములగు సర్వాధికారము లొసగబడియున్నవి.
- ↑ బ్రిటీషు పార్లమెంటు ఇంగ్లీషు ప్రజాప్రతినిధుల సంస్థగాని మన ప్రతినిధికాదు. అందువలన నది భారతదేశమును బ్రిటీషు ప్రజల ఆర్ధిక క్షేమము కొరకే ఉపయోగించి తీరును.
