పుట:ప్రభావతీప్రద్యుమ్నము (పింగళి సూరన).pdf/180

తే.⁠

అన విడువు మచ్చటికి నే నరుగుదెంచి యలుక తీర్చెదఁ గాదేని జలరుహాక్షి యాస విడువు మిచ్చటికి నీ వరుగుదెంచి నీదు మధురంపుమోవితేనియలు నాకు.

⁠ 137

వ.⁠

అని యంతకంతకుఁ బెరిఁగెడు పరిరంభరాగతత్పరతావశంబున.

⁠ 138

ఉ.⁠

రాఁగదె యోసుధాంశుముఖి రాఁగదె యోకఠినోన్నతస్తనీ రాఁగదె యోవిలాసవతి రాఁగదె యోకలకంఠభాషిణీ రాఁగదె యోకళావిదుషి రాఁగదె యోకలహంసగామినీ రాఁగదె యోగుణైకనిధి రాఁగదె యోలలితాంగి డగ్గఱన్.

⁠ 139

క.⁠

కలికీ రాఁగదె చిలుకల కొలికా రాఁగదె లతాంతకోదండునిపూ ములికీ రాఁగదె యూరక యలికీరార్భటుల నేల యలఁచెదు నన్నున్.

⁠ 140

వ.⁠

అని వేఁడుకొనుచున్నంతం బట్టణంబులోనం దనవిడిదివా కిటం బ్రాబోధికంబు లైన వాద్యస్వనంబులు వినంబడు టయు వజ్రనాభుపడవాళ్లు పిలువవచ్చువేళ యయ్యెఁ గావలయు నింతటం బోక యున్నఁ గార్యంబు తప్పు ననుచు లేచి యాత్మకల్పితభూవివరద్వారంబునకై చనియె నప్పుడు.

⁠ 141

క.⁠

వెఱపింపఁబోయి వెఱచిన తెఱఁగునఁ దా వేఁడుకొనఁ బతి న్వెనుకొనియెం చెఱవ తనయల్క కడుఁ గీ డ్పఱచి విజృంభించువిరహపరితాపముచేన్.

⁠ 142