పుట:పూర్వకవుల శృంగారప్రబంధములు.pdf/217

వికీసోర్స్ నుండి
ఈ పుట అచ్చుదిద్దబడ్డది


చ.

అవసరముండి నేఁబలుకుమన్నను బల్కవు. పంచదారచి
ల్క వంటర! నిశ్చయం బగు శుకంబుగ నాభుజపంజరంబునన్
వివిధవినోదవాక్కులను వీనులవిందుగఁ బల్కుచున్ వసిం
తువనిన, నీకు నాపెదవిదొండను తిండిగఁ బెట్టెదం బ్రియా.

21


చ.

వనిత దనంతఁ దా వలసివచ్చినఁ జుల్కనయంచు, నన్నుఁ జు
ల్కనగను జూడఁబోకుముర, కాదని చుల్కగఁ జూడ నెంచుకొ
న్నను, పురుషాయితంబులను నామెయిభారముగాఁగనుండఁ బో
దని యయివన్ ననుం గలయరా వలరాయనికేళి నాయకా.

22


చ.

మగఁడన కంటికింపగుచు మక్కువగొల్పు నతండెయంచు ము
న్తగవును దెల్పెఁదార, యలతారకుఁ జంద్రుఁడువోలె నీవు నా
మగఁడవు త్రాఁడులేని యనుమానము తీఱఁగ, బాహుపాశమున్
బిగువుగ నాగళంబులను బ్రేమను గట్టఁగదోయి నాయకా.

23


సీ.

ముద్దాడెదను రార మోహనాకార నన్
            ముద్దాడ నీకు మోమాటమైన,
పెదవి నొక్కెద రార ప్రియనాయకా నాదు
            పెదవి నొక్కుట నీకు బిడియమైన,
కౌఁగిలించెద రార కామినీమార నన్
            కౌఁగిలించుట నీకు కష్టమైన,
సరస మాడెద రార సరసుఁడా, నాతోడ
            సరసమాడుట నీకు శంకయైన,
కటకటా! నోట వ్రేల్ వెట్ట కఱవలేని
కరణి నున్నావుగాని, యెందఱపెదవుల
గఱచినట్టి భుజంగశిఖామణి వొకొ!
ఎట్టిపుట్టలో, నేపామొ యెవరి కెఱుక?

24