పుట:పూర్వకవుల శృంగారప్రబంధములు.pdf/150

వికీసోర్స్ నుండి
ఈ పుట అచ్చుదిద్దబడ్డది


ఆ.

కప్పువిప్పు గలుగు గొప్ప కొప్పలరారు
నప్పొలంతిఁ జొప్పు త్రిప్పుకిప్పు
డొప్పుమీఱ మీరు చెప్పరే గుప్పున
మెప్పు లిత్తు నుప్పితిప్పలార!

94


క.

మీ రింద ఱొకటి యై పొలు
పారం దిట మూనఁ బల్కి యతిరయమున నో
కోరిందడొంకలారా
సారేందుముఖీలలామ జాడ దెలుపరే.

95


క.

మారార్తి నెంత వేఁడిన
మా రాకడఁ దెలియఁజెప్పి మా ఱాడక యో
జోరీఁగలార మీ రా
నారీరత్నమును దెచ్చి నా కొసఁగరుగా.

96


క.

చింతలనాటి కులీనుఁడ
చింతాసంతాపచలితచిత్తుఁడ నిను నేఁ
జింతామణిగా నెన్నెదఁ
జింతా! యక్కాంత తెరువు చెప్పుము నాకున్‌.

97


సీ.

వ్రణకిణాంకితయోనిగణికాలలామ నా
            లోకింపరే తుమ్మమ్రాకులార
తుంబీఫలసమానలంబమానోరోజఁ
            బొడగానరేఁ బట్టకడుములార
యింగాళకంబళశృంగారతరకేశ
            పాశ నీక్షింపరే పాశలార
క్రకచదంష్ట్రాంకురాగ్రమృదుత్వసంయుక్త
            దేహఁ గానరె తిప్పతీఁగలార.


గీ.

ఉష్ట్రరదనచ్ఛదోపమానోష్టబింబ
నీడఁ జూడరె మీరు జిల్లేడులార
మర్దళసమానవిపరీతమధ్యచంద్రిఁ
గాంచరే నిక్కముగ నేఁడుగారలార.

98