పుట:పంచతంత్రము (బైచరాజు వేంకటనాథుడు).pdf/158

వికీసోర్స్ నుండి
ఈ పుట అచ్చుదిద్దబడ్డది


కురిసెం బుష్పరసైక్షవంబు చిగురాకుం గొప్పెర ల్నిండగన్.

116


చ.

సరసులలో సువర్ణపరిషక్తములై కనుపట్టుకోశముల్
గర మనురక్తి చూచి మృదులస్వర ముట్టిపడ న్సుభాషితో
త్కరము విధాత కెక్కుడగుగౌరవ మొప్పఁ బడించుఁ జూచితే
హరిణవిలోచనా పరమహంసవతంసము లూర్జికస్థితిన్.

117


మ.

గమకంపుంబసనేలపై దిగినశాఖల్ హస్తపాద్విభ్రమా
భ్రమఁ బుట్టింప లతాంతబిందుకులముల్ పైదేర నుద్యద్ద్రవ
త్సుమధూళీమదధార లూర నళీపంక్తుల్ గప్ప నుద్యానపా
నమహిం గానఁగనయ్యెఁ జూచితివె పున్నాగంబు బింబాధరా.

118


ఉ.

ఉన్నతి నంబరం బొరసి యొచ్చె మొకింతయులేక కొమ్మలం
గన్నులపండుపై బవరిగా నరుదెందిన ప్రాసవాసవో
త్పన్నఝరం బగడ్త దెలుప న్గులపాలిక యొప్పె జూడు మా
సన్నబలైకపత్రకవిశాలము సాల మఖండమూలమున్.

119


చ.

చదువులమేలు లేదొ శుకసంతతి గాదొ వినీతిరీతి చా
లదొ భజియించునీచతురుల న్మఱిమాటకు వచ్చునిచ్చలుం
బదివదిగా నొనర్చు ఫలభంగము నెమ్మొగ మెఱ్ఱజేయు న
ల్లదె పరికింపు చిల్కహృదయంబున గోపము జిల్కె దొయ్యలీ.

120


చ.

సరళగభీరశబ్దఘనసారసమృద్ధిఁ బ్రసిద్ధిగన్నయా
సరసులఁ గూడి చారుగతి సద్వితతు ల్భజియింప బాదప
స్ఫురణ ఘటింపుచుం దొడుసు పుట్టక యుజ్జ్వలధారచే నుదా
హరణము జేయుచున్నకవి నారసి చూడు మరాళగామినీ.

121


క.

నిరుపమఘనరసపుష్టీ, స్ఫురణం బాదములు మెఱయ భూభువనమునన్
సరి జెప్పఁగలదె యిందిం, దిరకుంతల యీవసంతతిలకంబునకున్.

122


క.

విరికొఱవులఁ బథికపరం, పర జూడుంజూడు మిట్టిపరుషపలాశో
త్కరమునకు నెట్లు గలిగెం, ధరణీసురదండవిధిసుధామధురోష్ఠీ.

123


చ.

గళితఫలాశఁ బూజకలికాచ్ఛలనంబున విస్ఫులింగము
ల్చిలుకుచు మత్తకోకిల విశృంఖలఘోషమిషంబుచేత గ
ర్జిలుచు ధూపరాగముల రేఁచి నడి న్సుడిగొంచువచ్చెడిం
బెలుచమనోజమాంత్రికుఁడు పెంచిన గాలిపిశాచిఁ జూచితే.

124