పుట:పంచతంత్రము (బైచరాజు వేంకటనాథుడు).pdf/146

వికీసోర్స్ నుండి
ఈ పుట అచ్చుదిద్దబడ్డది


తే.

మఱి త్రిశంకునకా పచ్చిమాలతనము, దృపదనందనకా రాచతొత్తుపాటు
మనుజుఁ డెవ్వఁడు కర్మస్వతంత్రుఁ డరయ, నీశ్వరుఁడు గాక సమకూర్ప నిట్టిపనులు.

383


వ.

ఇది యెఱిఁగి ప్రజ్ఞాన్యాయంబు లేమఱక యుండవలయు దైవబలంబు గలవాఁడ వ
గుట నీకు శీఘ్రకాలంబునఁ గార్యసిద్ధి యయ్యె నిరమిత్రుండవయితి ప్రాప్తమి
త్రుండవయితి వింకఁ బ్రాజ్యవైభవంబున రాజ్యంబు సేయుమని చిరజీవి చెప్పిన
మేఘవర్ణుండు సకలసంపత్పరిపూర్ణుండై రాజ్యభోగంబు లనుభవింపుచుండె.

384


క.

అని చెప్పిన ధరణీవర, తనయులు నిజగురునిఁ జూచి తాత్వికముఖ్యా
వినఁ బ్రియ మయ్యెడు జెపుమా, యనువారఁ జతుర్ధతంత్ర మని యడుగుటయున్.

385


చ.

అతనుభయంకరైకవిషమాంబకసమ్యగనంతభోగసం
గతవిగతాంతరాయగతి గాఢవినాయకనత్తచిత్తజా
దృతిబహుపద్మజాండమణిదీపితకుక్షికరంకమందరీ
కృతికపరతత్త్వవిజ్జటిమృగేంద్రవికస్వరయోగపుష్కరా.

386


క.

రంగత్తరజాతమహా, గాంగేయస్తవనఘటితఘనపులకాయ
త్నాంగనిచోళయమప్రా, గ్రంగస్థలమధ్యసంచరణశైలూషా.

387


మాలిని.

కలుషమశకధూమా క్లాంతచింతామరామా
ప్రళయకరణరోషా ప్రాణిసంగుప్తితోషా
విలసదచలధర్మా విశ్రుతశ్రౌతకర్మా
సులభభజనలోలా సుస్థిరశ్రీవిలాసా.

388


గద్య.

ఇది శ్రీ వేంకటనాథకరుణాలబ్ధసరససాహిత్య నిత్యకవితావిలాస సకల
సుకవికృతకైవారభాషణోల్లాస రాజకులపారావారపర్వశర్వరీరమణ సీతిశాస్త్రమార్గ
పరిశ్రమణ ధైర్యపర్యాయధిక్కృత నీహారపర్వతపర్వతరాజకుమార నిస్సహాయప్ర
బంధనిర్మాణభోజభూదార సుధామధురభారతీసనాథ వేంకటనాథప్రణీతం బైన
పంచతంత్రంబున సంధివిగ్రహం బన్నది తృతీయాశ్వాసము.