పుట:పంచతంత్రము (బైచరాజు వేంకటనాథుడు).pdf/138

వికీసోర్స్ నుండి
ఈ పుట అచ్చుదిద్దబడ్డది


తే.

పరుషవాసిష్ఠశాపసంప్రాప్యమాణ, మిత్రసహపుత్ర గీర్వాణశత్రువేష
సముదితక్లాంతిహృతిసమ్యగమృతవృష్టి, గంగ పొగడంగ నెగడు రంగత్తరంగ.

300


సీ.

తజ్జలంబుల నొక్కతపసి యాస్వాదింప శయపుటం బల్లనఁ జాఁపుచోటఁ
దటకుటానిలనటద్విటపకాండవిషణ్ణఘనగృధ్రచంచునిర్గతిత యగుచు
మూషిక పడియె నమ్ముని దాని నిజతపోమహిమ నొక్కమనోజ్ఞమహిళఁ జేసి
కన్నకూఁతునకంటెఁ గడుగారవంబునఁ బోషింప నొకకొన్నిపూఁటలకును


ఆ.

గుఱులు గూడై మేను మెఱుఁగెక్కెఁ బాలిండ్లు, బయలు మెఱసెఁ బిఱుఁదు బలిసె నడలు
ముఱిప మెఱిఁగె సిగ్గు మోమున నివురొత్తెఁ, దోయజాస్య కలరుఁ బ్రాయమైన.

301


క.

కలితరుచిమించువించున, ఫలముంబలె నూఁగునూఁగుఁబ్రాయము చెల్లిపై
నిలువం గని ముని మను వీ, వాలెనని తలపోసి నధికవాత్సల్యమునన్.

302


క.

ప్రతినూతవర్తువేళా, న్విత యెవ్వతె యవ్వధూటి వృషలి యగు న్ద
త్సతిపాణిగ్రహణముఁగా, మతిఁ దలఁపరు సుమతుల నభిమతమై యునికిన్.

303


వ.

ఇంతకుమున్ను వివాహంబు సేయలేనైతి నిచ్చిపుచ్చుకొనువారికిఁ గులధనాదిగౌర
వంబులు సదృశంబులు నయిన ననురాగంబు పెరుగు యౌవనాదులు పరస్పరాను
రూపంబు లయియుండిన సతిపతులకు ప్రేమాంకురంబులు వృద్ధిబొందుఁ గావున
నివ్వనజగంధి మహానుభావుండగు సూర్యదేవునకుం బరిణయంబు సేసెద నని య
మ్ముని తీవ్రధాము నాకర్షించి.

304


సీ.

తను నోరఁ బేరు గ్రుచ్చినవారి కారోగ్య మిచ్చువాఁ డఘముల వ్రచ్చువాఁడు
పరరాజసంబాధ విరియుచక్రముల రక్షించువాఁ డిఱుల శిక్షించువాఁడు
వేదాంతశుద్ధాంతవీథుల నోలగం బుండువాఁ డాపద ల్చెండువాఁడు
దుష్టమందేహసందోహంబు నెలగోలు తరమువాఁడు మురారితరమువాఁడు


తే.

సంప్రదోషవచస్స్థితి జలదరించు, నవనిజనులకు దృష్టిపాటవము నిచ్చి
మించువాఁ డెల్లదిశల దీసించువాఁడు, సారసాప్తుండు మునికి సాక్షాత్కరించె.

305


చ.

ముని యలతీవ్రధాముని సముజ్జ్వలధామునిఁ బూజసేసి యి
ట్లను దిననాథ యిక్కిసలయాధర పెంపుడుబిడ్డ నాకు నీ
కెన సుముహూర్తవేళ వరియింపుము నీ కిదె యిత్తు నన్న న
వ్వనరుహబాంధవుండు శ్రుతవంతుఁ బ్రశాంతునిఁ జూచి యిట్లనున్.

306


తే.

అనఘ నాకన్నఁ బర్జన్యుఁ డధికుఁ డభ్ర, సంచయంబున నను నిరోధించుఁ గాన
నమ్మహాతున కీకన్య నఖిలమాన్యఁ, బరిణయము సేయు మది నీకుఁ బరమశుభము.

307


క.

అని చెప్పి తపనుఁ డరిగిన, ననఘుం బర్జన్యు నంత నాకర్షింపన్
జనుదెంచి నిలిచె నతఁ డ, మ్ముని యువ్వేల్పునకు నెయ్యమున నిట్లనియెన్.

308