పుట:నృసింహపురాణము.pdf/12

వికీసోర్స్ నుండి
ఈ పుట అచ్చుదిద్దబడ్డది

ప్రథమాశ్వాసము

13


సీ.

నారాయణునిదివ్యనామసంకీర్తనం బనిశంబుఁ జేయుమహాత్ములకును
బద్మాక్షుశ్రీపాదపద్మంబు లత్యంతభక్తిమైఁ బూజించుప్రాజ్ఞులకును
విశ్వరూపునిమూర్తివిభవంబు నేకాగ్రబుద్ధి భావించుసత్పురుషులకును
లక్ష్మీశ్వరునిసముల్లాసహేతువు లగువ్రతములు సల్పుసద్వర్తనులకు


గీ.

భవము దీఱినతుది సచ్చి భవ్యసుఖము, లనుభవింపంగఁ దగునెల వగుటఁ జేసి
యఖిలవస్తుసంపదలకు నాకరంబు, గుణవిధావిభాసురము వైకుంఠపురము.

45


చ.

శ్రుతిమతధర్మయోగములు చోద్యపుమూల్యము లప్పురంబునం
జతురతఁ బుణ్యవస్తువులు సారవిముక్తిపదమ్ము లమ్మువా
రతులితవిష్ణుశాసనసమాహితు లైనమహాత్ము లంచితో
ద్ధతిఁ గొనువారు భూరివిహితవ్రతపారగు లైనబోధనుల్.

46


సీ.

తమవాఁడిచూడ్కి కందర్పున కేపని యైన సాధించుదివ్యాస్త్ర మనఁగఁ
దగుతియ్యపలుకులు ప్రమదరాగాంబుధిఁ దనరారుమవ్వంపుదరఁగ లనఁగఁ
దమవింతచెయ్వులు కమనీయకోమలశృంగారతనువులేఁజిగురు లనఁగఁ
దమముద్దునవ్వులు తమకంపుఁజీఁకటి నిగిడించుసరిదివెన్నెల లనంగఁ


ఆ.

జొక్కుమందు లనఁగ సోయగంబులగను, లనఁగ సుఖమునిక్క లనఁగఁ జాలి
యనుపమానమూర్తులై యుల్లసిల్లుదు, రంబుజాయతాక్షు లప్పురమున.

47


ఉ.

మారుని గన్నతండ్రి, సిరిమానసము న్గబళించునేర్పుసొం
పారఁగ నైజమై చను మహారసికుండు సమగ్రసారశృం
గారరసాధిదేవత జగద్రమణుండు మురారి యట్టిశృం
గారరసైకపాత్ర మనఁ గాఁ దగదే పురరత్న మెమ్మెయిన్.

48


ఉ.

శ్రీసతికి న్మురారికిని సేసలు పెట్టినపెండ్లిపెద్ద ల
బ్జాసనుఁ డంబుజోదరమునం దుదయించిననాఁడు చేరి యు
ల్లాసము పల్లవింప నుపలాలనఁ జేసినయమ్మ లెల్ల సం
తోసమున న్ముకుందుసయిదోడులు తత్పురపుణ్యభామినుల్.

49


సీ.

హరిదాసులను హత్తి కరులు శ్రీకరు లెల్లఁ గల్క్యవతారసంకల్పలీల
శ్రీనాయకుఁడు సవరించిన బలుమావుబడిపుట్టినవి హయప్రతతు లెల్లఁ
బుట్టువుఁ జావును బోనంగఁ దట్టిన గరువంపుదిట్టలు పురుషు లెల్ల
దివ్యవిమానమాత్రికము గేహము లెల్లఁ గౌస్తుభజ్ఞాతులు కమ్రరత్న


గీ.

జాతు లెల్ల విరించి హంసవ్రజంబు, బలఁగ మింపార రాయంచపదవు లెల్ల
విమలకమలాక్షునాభిపద్మమునఁ గన్న, తమ్ము లెప్పుడు కొలఁకులతమ్ము లెల్ల.

50


ఆ.

సకలకాలకుసుమసంపద సొంపారి, నిఖిలసుఖవిహారనిర్మితులకు
గారణంబులై యుదారమందారంబు, లగుచుఁ బురవనంబు లలరు నెపుడు.

51