పుట:ది ఇండియన్ పీనల్ కోడు.pdf/3

వికీసోర్స్ నుండి
ఈ పుట అచ్చుదిద్దబడ్డది

2


ఉదాహరణములు

(ఏ) ఈ స్మృతిలో అపరాధముల నిర్వచనములున్న పరిచ్ఛేదములు ఏడు సంవత్సరముల లోపు వయసు గల బిడ్డ అట్టి అపరాధము చేయజాలడని తెలుపవు; కాని, ఆ నిర్వచనములు -- “ఏడు సంవత్సరముల లోపు వయసు గల బిడ్డ చేసిన దేదియు అపరాధముకాదు” అను నిబంధనగల సాధారణ మినహాయింపునకు లోబడియున్నట్లు వాటిని అర్ధము చేసికొనవలెను.

(బి) హత్య చేసినట్టి 'జడ్' ను వారంటు లేకుండ ఒక పోలీసు అధికారి అయిన, 'ఏ' పట్టు కొనును. ఇచట 'ఏ' అక్రమపరిరోధము అను అపరాధము చేయలేదు. ఏలనన, 'జడ్'ను పట్టుకొనుటకు 'ఏ' శాసనరీత్యా బద్దుడై యున్నాడు. అందుచే ఒక వ్యక్తి దేనినైనను "చేయుటకు శాసనరీత్యా బద్దుడై యుండి దానిని చేసినచో అది అపరాధము కాదు” అను నిబంధనగల సాధారణ మినహాయింపు క్రిందికి ఈ కేసు వచ్చును.

ఒకసారి విశదీకరించిన పదము యొక్క భావము.

7. ఈ స్మృతి యొక్క ఏ భాగమునందైనను విశదీకరించినను ప్రతి పదము, ఆ విశదీకరణముననుసరించియే ఈ స్మృతి యొక్క ప్రతి భాగమునందును ఉపయోగింపబడినది.

లింగము.

8. "అతడు" అను సర్వనామము మరియు దాని జన్యములు, స్త్రీ పురుష వ్యక్తులలో ఏ వ్యక్తిని గురించి యైనను లింగభేదము లేకుండా ఉపయోగింపబడినవి.

వచనము.

9. సందర్భమును బట్టి వైరుధ్యము కాన్పించిననే తప్ప, ఏకవచనార్థమునిచ్చు పదములయందు బహువచనము చేరియుండును; మరియు బహువచనార్ధమునిచ్చు పదములయందు ఏకవచనము చేరియుండును.

“పురుషుడు"

10. "పురుషుడు” అను పదము, ఏ వయసు గల వాడైనను, మగ మనిషిని తెలుపును.

“స్త్రీ "

“స్త్రీ "అను పదము ఏ వయసుగలదైనను ఆడ మనిషిని తెలుపును.

"వ్యక్తి "

11. "వ్యక్తి " అను పదపరిధియందు ఏదేని కంపెనీ, లేక అసోసియేషను, లేక కార్పొరేషనుగా ఏర్పడినదైనను కాకున్నను, వ్యక్తుల నికాయము చేరియుండును.

“ప్రజలు ”

12. "ప్రజలు" అను పదపరిధియందు ప్రజలలోని ఏ వర్గమైనను లేక ఏ సమాజమైనము చేరియుండును.

13. ... ... ... ...

“ప్రభుత్వ సేవకుడు"

14. "ప్రభుత్వ సేవకుడు" అను పదములు ప్రభుత్వ ప్రాధికారముచే, లేక ప్రాధికారము క్రింద భారత దేశమునందు పదవిలో కొనసాగింపబడిన, నియమింపబడిన, లేక నియోగింపబడిన ఎవరేని అధికారిని లేక సేవకుని తెలుపును.

15. ... ... ... ...

16. ... ... ... ...

“ ప్రభుత్వము "

17. "ప్రభుత్వము” అను పదము. కేంద్ర ప్రభుత్వమును లేక రాజ్య ప్రభుత్వమును తెలుపును.

“భారతదేశము "

18. భారతదేశము" ఆనగా, జమ్మూ-కాశ్మీరు రాజ్యము మినహా, భారతదేశ రాజ్య క్షేత్రము అని అర్ధము.

“న్యాయాధీశుడు"

19. “న్యాయాధీశుడు" అను పదము న్యాయాధీశుడను పదవీనామముగల ప్రతి వ్యక్తిని మాత్రమే కాక ఏదేని సివిలు లేక క్రిమినలు శాసనిక చర్యలో అంతిమ తీర్పును, లేక అపీలు చేయనిచో అంతిమముదగు తీర్పును,లేక ఎవరేని మరొక ప్రాధికారి ఖాయపరచిన అంతిమముదగు తీర్పును ఇచ్చుటకు శాసనము ద్వారా అధికారము పొందినట్టి ప్రతి వ్యక్తిని కూడ, లేక

అట్టి తీర్పునిచ్చుటకు శాసనము ద్వారా అధికారము పొందినట్టి వ్యక్తుల వికాయములో ఒకరైన ప్రతి వ్యక్తిని కూడ తెలుపును.

ఉదాహరణములు

(ఏ) 1859 లోని 10వ చట్టము క్రింది దావాయందు అధికారితను వినియోగించు కలెక్టరు ఒక న్యాయాధీశుడు