Jump to content

పుట:తెలంగాణ రుచులు.pdf/66

వికీసోర్స్ నుండి
ఈ పుట అచ్చుదిద్దబడ్డది

బెల్లపన్నం / పరమాన్నం

కావలసిన వస్తువులు
బియ్యం 1/4 కేజి. పాలు 1/4 లీటరు
ఇలాచిపొడి 1 టీస్పూన్ బెల్లం 1/4 కేజి.
నెయ్యి 5 టీస్పూన్లు జీడిపప్పు, కిస్మిస్ 10

తయారుచేసే విధానం

బెల్లం తురిమి కొద్దిగా నీళ్ళు పోసి వేడి చేసి కరిగిన తర్వాత వడకట్టుకోవాలి. బియ్యం కడిగి అరగంట నానిన తర్వాత మెత్తగా వండుకోవాలి. గరిటెతో మెదిపి వేడిపాలు, బెల్లం కరిగించిన నీళ్ళు పోసి ఉడికించాలి. అన్నీ కలిసి ఉడికి దగ్గర పడ్డాక నేతితో వేయించిన జీడిపప్పు, కిస్మిస్, నెయ్యి, ఇలాచిపొడి వేసి కలిపి మూతపెట్టాలి.

చక్కెర పొంగలి

కావలసిన వస్తువులు
బియ్యం 3 కప్పులు పెసరపప్పు 1 కప్పు
జీడిపప్పు, కిస్మిస్ 12 నెయ్యి 6 టీస్పూన్లు
ఇలాచిపొడి 1 టీస్పూన్ చక్కెర 1/4 కప్పు

తయారుచేసే విధానం

బియ్యం కడిగి నీళ్ళు పోసి అరగంట నానబెట్టాలి. రెండు చెంచాల నెయ్యి వేడి చేసి జీడిపప్పు, కిస్మిస్ వేయించి పక్కన పెట్టుకుని పెసరపప్పు వేసి దోరగా వేయించుకోవాలి. ఇందులో బియ్యం వేసి తగినన్ని నీళ్ళు పోసి మెత్తగా ఉడికించాలి. బియ్యం, పప్పు ఉడికిన తర్వాత గరిటతో మెదిపి చక్కెర వేసి పూర్తిగా కరిగి దగ్గర పడేవరకూ ఉడికించాలి. చివరిగా నేతిలో వేయించిన జీడిపప్పు, కిస్మిస్, ఇలాచిపొడి వేసి కలపాలి. కావాలంటే ఇంకొంచెం నెయ్యి వేసుకోవచ్చు.

కొర్రలు పాయసం

కావలసిన వస్తువులు
కొర్రలు 100 గ్రా.లు పాలు 500 మి.లీ.
పచ్చి కొబ్బరి తురుము 50 గ్రా.లు నెయ్యి 125 గ్రా.లు
ఇలాచిపొడి 1 టీస్పూన్ బెల్లం 100 గ్రా.లు

తయారుచేసే విధానం

కొర్రలు శుభ్రం చేసి కడిగి నీళ్ళు పోసి గంటసేపు నానబెట్టాలి. తర్వాత మెత్తగా ఉడికించాలి. కొర్రలు ఉడికిన తర్వాత గరిటతో మెదిపి పాలు, బెల్లం. కొబ్బరి తురుము వేసి కలుపుతూ ఉడికించాలి. బెల్లం కరిగి, బాగా ఉడికి చిక్కబడుతుండగా ఇలాచిపొడి, నెయ్యి వేసి కలిపి దింపేయాలి.

45

తెలంగాణ రుచులు