| శా. |
తల్లీ రాముఁడు నిత్య మర్కజసుమిత్రాపుత్రులం గూడి తా
నుల్లంబందుఁ దలంచు చుండు నితరోద్యోగంబులున్ మాని నీ
సల్లాపంబులు నీవిలాసములు నీచారిత్రముల్ నీదుభా
స్వల్లావణ్యము నీమనోజ్ఞగుణము ల్వాక్రుచ్చి వర్ణించుచున్.
| 753
|
| చ. |
క్షితిసుత దైత్యమధ్యమునఁ జిక్కియుఁ జావక దైవికంబునన్
బ్రతికితి వింక నాపద దొఱంగెడుకాలము డాయవచ్చె సు
వ్రతుఁ డగునీదువల్లభుఁడు భానుజలక్ష్మణయుక్తుఁ డై కపి
ప్రతతులమధ్యదేశమున భాసిలుచుండఁగఁ గాంచె దెంతయున్.
| 754
|
| ఉ. |
భూవరపుత్రి యేను గపిముఖ్యుల కెల్ల నధీశుఁ డైనసు
గ్రీవసఖుండ వాయుజుఁడఁ గీశవరుండ హనూమదాఖ్యుఁడన్
ఈవనరాశి దాఁటిఁ దనుజేంద్రశిరంబులు దన్ని లోకసం
భావితవీర్యగర్వమున వచ్చితి రామునివార్త దెల్పఁగన్.
| 755
|
| ఉ. |
అంకిలిఁ జెప్పలేదు జనకాత్మజ నే నసురుండఁ గాను మీ
నాంకసమానసుందరున కంచితకీర్తికి రామమూర్తికిన్
గింకరుఁడం దదాజ్ఞ నిను నేర్పునఁ దేర్పఁగ వచ్చినాఁడ నీ
శంక పరిత్యజింపుము విచారము వల్వదు నమ్ము నెమ్మదిన్.
| 756
|
సీత హనుమంతుని రామలక్ష్మణులరూపగుణవిశేషప్రకారం బడుగుట
| వ. |
అని విన్నవించిన రామునికథావృత్తాంతంబు విని యద్దేవి హనుమంతు నవలో
కించి మృదుమధురవాక్యంబుల వెండియు ని ట్లనియె.
| 757
|
| చ. |
హరివర యెంత నీవు నిజమాడిన నే మది నమ్మఁ జాల నీ
వఱకు వనంబులోన నరవానరనాథులకు న్సఖిత్వ మె
త్తెఱఁగునఁ గల్గె రాఘవులు దివ్యకళామహిమంబు లెల్ల నే
కరణి నెఱింగి తీవు వినఁగావలతు న్వివరింపు మింపుగన్.
| 758
|
| చ. |
అరయఁగ రామలక్ష్మణుల యందము చందము తత్ప్రభావమున్
గురుతరవిక్రమక్రమ మకుంఠితతేజము రూపసంపద
ల్పరఁగ శరీరవర్ణములు బాహుపదోరుగతిప్రమాణముల్
గుఱుతుగఁ జెప్పితేని కపికుంజర నామది నిన్ను నమ్మెదన్.
| 760
|
| వ. |
అనిన విని యమ్మరున్నందనుండు రామలక్ష్మణుల రూపలక్షణవిశేషంబు లెఱిం
గింపం దలంచి సీత నవలోకించి దేవి మత్కృతంబునందు మనంబునఁ బొడమిన
సందియంబు పాయుటకు మద్భాగ్యవిశేషంబున రామలక్ష్మణులసర్వావయవ
సన్నివేశప్రకారం బెఱింగింపు మని యడిగితివి దీనం గొఱంత యేమి యత్తెఱం
గు సవిస్తరంబుగా వినిపించెద దత్తావధానవై విను మని యి ట్లనియె.
| 761
|
