పుట:కాశీఖండము.pdf/247

శ్రీకాశీఖండము

234

సీ.⁠

మణికర్ణికావారి మజ్జనం బొనరించి         యవిముక్తమునయందు శివుని నిల్పి యాశివలింగంబు ననిశంబు సేవించి         యందు విశ్వేశ్వరు నావహించి పంచాక్షరీమంత్రపారాయణంబును         బ్రణవమంత్రంబును బరిచరించి విశ్వనాయకుకృపావిభవంబు పెంపునఁ         బరమోన్నతం బైన పదము గాంచెఁ

⁠

తే.⁠

గాశిలోన ధ్రువేశ్వరుఁ గాలగంఠు భక్తి సేవింప ధ్రువ మైనపదము గలుగుఁ బంచజనులకు నిది సిద్ధభాషితంబు సమధికస్మార్తశుభకర్మ! శంబుశర్మ.

⁠ 288

వ.⁠

అని చెప్పి రంత నివ్విమానంబు ధ్రువలోకంబు గడచి క్రమంబున మహాలోకజనోలోకతపోలోకంబు లతిక్రమించి సత్యలోకంబు గదిసె. అప్పు డవ్విష్ణుకింకరులు శివశర్మ కి ట్లనిరి.

⁠ 289

శివశర్మ బ్రహ్మవిష్ణుమహేశ్వరలోకంబుల కేగుదెంచుట

క.⁠

ముందఱిది సత్యలోకము సందర్శింపుము త్రిణేత్రశర్మ! ధరిత్రీ బృందాలక! యిది పరమా నందస్థానంబు ద్రుహిణునకు నెల వగుటన్.

⁠ 290

వ.⁠

అనుచు నతనిం బద్మగర్భుసన్నిధికిం గొనిపోయి రప్పు డవ్విభుండును వారలం బ్రసాదబహుమానంబులం దనిపి ప్రసంగవశంబున నమ్మహాశ్మశానంబున మృతుండు గానివానికి ముక్తి సిద్ధింప దని సముచితప్రకారంబుగా వీడుకొలిపె.

⁠