శ్రీగురుభ్యో నమః.
అష్టాంగయోగసారము
కం॥ శ్రీగణనాథుని దుర్గను
బాగుగ శంకరుని క్షేత్రపాలుని వాణిన్
శ్రీగురు సుబ్రహ్మణ్యుని
యోగుల సురమౌని భక్తియుతులన్ గొలుతున్॥
సీ॥ వన్నె కెక్కిన నందవరచౌడమాంబను
శ్రీనివాసుని విరించిని నుతించి
శ్రీతరిగొండ నృసింహుని కీర్తించి
యా వరాహపురాణ మలఘుపద్య
కావ్యంబుఁ జేసి యోగములందు విస్తార
ముగ రచించితిఁ గాన మొనసి సభల
నీ యోగమర్మంబు లెఱిఁగి చెప్పం దగు
ననుచుఁ గొందఱు వల్కి రందువలన
గీ॥ నా వరాహపురాణమం దమరు యోగ
సరణి నీవలఁ దీసి యెచ్చటను భక్తి
యోగమే యుంచి యష్టాంగయోగసార
మనఁగ నీకృతి రచియింతు నార్యులార॥
వ॥ మదపచారంబు క్షమించి తత్కథాక్రమం బెట్లన్నను.
చం॥ వెలయు పురాణధర్మములు వేడ్కగ సూతుఁడు దెల్ప శౌనకా
దులు విని యొక్కనాఁడు బహుదుస్తర యోగవిధానమర్మముల్
దెలుపుమటన్న నా ఘనుఁడు ధీరతమీరఁగ నమ్మునీంద్రులన్
గలయగఁ జూచి యిట్లనియె గౌరవమొప్ప గురుందలంచుచున్॥
