తాళ్ళపాక పదసాహిత్యం/ఐదవ సంపుటం/రేకు 486
రేకు: 0086-1 ఆహిరి సం: 05-326
పల్లవి:
జట్టిగొనెర నిన్ను జవరాలు
చిట్టంటు చేఁతల జెలఁగితివపుడు
చ. 1:
వాలుకచూపులు వాడఁగ నాటక-
సాలలోన నిను జవరాలు
చాలుగ మురియుచు సరుగనఁ జివుకన
కాలఁ జిమ్మినను కలఁగితివపుడు
చ. 2:
సొలపుగొనుచు మించుల మొలనూళ్ళ
సళుపుల మురిపెపు జవరాలు
గలగల గజ్జెలు గదలఁగ నునుఁదొడ
బలిమిఁ గదలిచిన బ్రమసితివపుడు
చ. 3:
సొంపగు తల చంచుల మునివేళ్ళ-
సంపద నడపుల జవరాలు
యింపులు నెరవుచు నిటె నినుఁ గదిసిన
కంపించితి వేంకటగిరిరమణ
రేకు: 0086-2 సామంతం సం: 05-327
పల్లవి:
అద్దిరా చిమ్ముల మాటలప్పటి నీకు
పెద్దరికాలనె మురిపెములే చిమ్మేవు
చ. 1:
వద్దన్న మానవు నేనెవ్వతెరా నీకు నీ-
నిద్దురచూపులు నాపై నివాళించేవు
బద్దులెల్లనేడ నగపడెరా నీకు యీ-
ముద్దులమాటలాడుచు మోమే వంచేవు
చ. 2:
డెందములో నేనిఁకనేఁటికిరా నీకు నీ-
యందిపాటుచేఁతల నన్నలయించేవు
కిందిచూపులేడ దొరకెరా నీకు నీ-
చెందమ్మిచేతుల నాచెఱఁగువట్టేవు
చ. 3:
బింకములెవ్వతె నేరిపెరా నీకు నీ-
కుంకుమపూతలే చెరఁగునఁ గుప్పేవు
యింక నిన్నియునేల యిదె నీకు తిరు-
వేంకటేశ నాకౌఁగిట వేడుకఁ గూడితివి
రేకు: 0086-3 రామక్రియ సం: 05-328
పల్లవి:
పంతమాడి పిలిచినఁ బలుకదెవ్వరితోడ
యింతవలచిన వలపెంచునైనఁ గలదా
చ. 1:
వెక్కనపు గుబ్బలపైవేసిన కప్పురమెల్ల
నొక్కమాటే నీరాయనోయమ్మా
మిక్కుటమైన దీని మేనిమీఁది వెక్కచూచి
వక్కలాయ గుండె యిట్టి వలపెందుఁ గలదా
చ. 2:
గుప్పెడి నిట్టూరుపుల కోమలిహరములెల్ల
వుప్పరాలెగయఁ జొచ్చెనోయమ్మా
వుప్పతిల్లుఁ జెమటల నోలలాడఁగానె మేను
నిప్పువలెనున్నదిట్టి నెయ్యమెందుఁ గలదా
చ. 3:
కొయ్యతనమునిట్టె కోనెటిరాయనిఁ గూడి
వుయ్యాలమంచముమీఁదనోయమ్మా
పయ్యెదచెరఁగు జారఁ బచ్చిసేఁతలిన్నియును
ముయ్యఁజూచీ నిటువంటిమోహమెందుఁ గలదా
రేకు: 0086-4 బౌళి సం: 05-329
పల్లవి:
ఎపుడు నాయెడ నికు నిదివలెనా
కపటాలు నిజములు కలిగినాతఁడవు
చ. 1:
వెల్లిగా నీవూర్పు వేదమట వేఁడి
చల్లీని శ్రుతికి నుష్ణము గలదా
పెల్లుగ నిరువంకఁ బిరువీకులై వేఁడి
చల్ద నీదైనా వెచ్చనిది గావలదా
చ. 2:
నగు నీమాటలే పురాణంబులట బొంకు
దగిలీని చదువులింతయు బొంకులా
తెగి యిరువంకలఁ దీదీపులై నీ
పొగరుల మాటలెప్పుడును నిక్కము లా
చ. 3:
చలివేఁడిచూపుల జాణవట యిట్టె
బలసి నాఫైఁ బరపఁగవలెనా
కలికివై తిరువేంకటవిభుఁడ నన్నుఁ
గలయక యలయించి కలిసితివిపుడు
రేకు: 0086-5 శ్రీరాగం-రచ్చెతాళం సం: 05-330
పల్లవి:
కనలకువే మతి కలఁగీని యీ-
వనజోదరుఁడిదె వచ్చీనిపుడు
చ. 1:
వడిఁ గుచభరమున వ్రాలెడి వేగము
నడవకువే సన్నపు నడుము
చిడుముడి నన్నుఁ జేసిన గోవిందుఁడు
తడయఁడు నిన్నుఁ దగిలీనిపుడు
చ. 2:
కొప్పువేఁగుననె కుదిసిన మెడ గడు-
తిప్పకువే కందెడి సరులు
దప్పివొదలఁ బరితాపము నీమై
కప్పిన శ్రీహరి గదిసీఁ గాని
చ. 3:
పొరలుచు నిట్టూర్పులను సురనియెదు
వెరవకుమెన్నఁడు వేదనల
కరఁగి నీవు వేంకటపతికౌఁగిట
మెరసితివిటు కడు మించిన రతుల
రేకు: 0086-6 ఆహిరి సం: 05-331
పల్లవి:
అలికి సంపెంగ తావికణఁగి నట్టు
తొలఁగీ నుదుట జారి తుమ్మిదల పిల్లలు
చ. 1:
వెలఁదియారను పాము వెంటఁబెట్టుకొని రాఁగా
తలఁకి చంద్రుఁడు వోయి దాఁగినట్టు
పలువెన్నె మెఱుఁగుల పయ్యదలోనె దాఁగె
చలివేఁడి మెఱుఁగుల చందమామపిల్లలు
చ. 2:
కోవిలపలుకుదాడి కోపగించి వెంటరాఁగా
తావుల చిగురువోయి దాఁగినట్టు
మోవి సూదివాటులై మొనసి కానవచ్చీని
మావుల చిగురులోని మాణికాలపిల్లలు
చ. 3:
భారమైన విరహతాపపు సూరియుండు రాఁగా
తారితారి చకోరాలు దాఁగినట్టు
కూరిమి వేంకటపతిఁ గూడిన తమకమున
గోరగించీనిదివో చకోరములు పిల్లలు