తాళ్ళపాక పదసాహిత్యం/ఐదవ సంపుటం/రేకు 404

by తాళ్ళపాక అన్నమాచార్యులు

రేకు: 0004-1 వసంతం సం: 05-018

పల్లవి:

శోభనమే శోభనమే
వైభవముల పావనమూర్తికి

చ. 1:

అరుదుగ మును నరకాసురుఁడు
సిరులతోఁ జెరలుదెచ్చిన సతుల
పరువపు వయసుల బదారువేలను
సారిదిఁ బెండ్లాడిన సుముఖునికి

చ. 2:

చెందిన వేడుక శిశుపాలుఁడు
అంది పెండ్లాడఁగ నవగ ళించి
విందువలెనె తా విచ్చేసి రుకుమిణి
సందడిఃఁబెండ్లాడిన సరసునికి

చ. 3:

దేవదానవులు ధీరతను
దావతిపడి వారి దరువఁగను
శ్రీ వనితామణిఁ జెలగి పెండ్లాడిన
శ్రీ వేంకటగిరి శ్రీ నిధికి

రేకు: 0004-2 పాడి. సం: 05-019

పల్లవి:

దేవరచిత్తం దివ్యనిధి
దేవనిర్మిత విధీ యవధానం

చ. 1:

అతివలు నాట్యంబాడెదమని వు-
న్నతి మెఱయుచు నున్నారిదివో
ప్రతినలతో రంభయు మేనకయును
ధృతి కరుణాంబుది ధీయవధానం

చ. 2:

గానవిద్య తమకంబున వినుమని
కానుకలివె సురకాంతలవి
కానుపించుకో గంధర్వసతులను
ధీనుత పంపు ధీ యవధానం

చ. 3:

పరియంకంబునఁ బవళించెదవో
సిరుల విభవముల జెలఁగెదవో
తిరువేంకటగిరి దేవ యన్నిటా
తిరమందితి విటు ధీయవధానం

రేకు: 0004-3 శంకరాభరణం సం: 05-020

పల్లవి:

ఇంతే విన్నపమింతేలా నీ-
పంతము చేకొంటి పాలించు

చ. 1:

అలయు సాలయునతివ లోలోనే
చెలిపై నొరగు చెక్కు నొక్కు
పులకించు నించు వొలఁతి చెమట
చిలికించు గోరఁజిత్తగించు

చ. 2:

చెలుల మొరఁగు చింతచే గరఁగు
పలుకఁ దలఁచు బడలును
పిలుచు నిన్ను నీపేరుకొనుచును
తొలఁకు కన్నీరు దుడుచును

చ. 3:

చనుఁగవ చూచు సారె నీసేఁతలు
తనలోనే మెచ్చి తనరును
అనయము వేంకటాధీశ యీ యింతిఁ
జెనకి కౌఁగిటఁ జేకొంటివి

రేకు: 0004-4 ముఖారి సం: 05-021

పల్లవి:

కలలోనె యిరువురము నలిగి వేగ
కలయనుచు దెలిసి నినుఁ గౌఁగిలించితిరా

చ. 1:

అలుగుదురెఁ బతులనఁగా వినఁగ
నలవాటు లేక నే నలుగుచుండుదురా
అలిగితట వురక నీవంత నాతోను మరి
నలుగులౌనట పూవులంతలోపలనే

చ. 2:

చందురుఁడె సూర్యుఁడై జరగ మిగుల
కెందమ్ములవుర నాకెంగేలుదోయి
గందమే తోఁచెనట కస్తూరియనఁగ నా-
చందమపుడొకలాగు చందమవునటరా

చ. 3:

విటవరుఁడ కోనేటివిభుఁడ నీ
వెటు దొలంగిన దేహమెట్టు నిలుపుదురా
యిటువలెనె మనలోన నెలమి మరచి
తటుకననుఁ గలయనుచు తలఁకి తెలిసితిరా

రేకు: 0004-5 నాదరామక్రియ సం: 05-022

పల్లవి:

సకలం హేఖి జానామి తత్‌
ప్రకటవిలాసం పరమం ధధసే

చ. 1:

అలికమృగమదమయ మషీకలనో
జ్జ్వలతాం హేసిఖి జానామి
లలితం తవ పల్లవిత మనసి ని-
శ్చలతర మేఘశ్యామం ధధసే

చ. 2:

చారుకపోల స్థల కరాంచిత వి-
చారం హేఖి జానామి
నారాయణ మహినాయకశయనం
శ్రీరమణం తవ చిత్తే ధధసే

చ. 3:

ఘనకుచశైలాగ్రస్థిత విధుమణి-
జననం హేఖి జానామి
కనదురసా వేంకటగిరి పతే-
ర్వినుత భోగసుఖ విభవం ధధసే

రేకు: 0004-6 భైరవి సం: 05-023

పల్లవి:

వనితభాగ్యంబు దేవరచిత్తము మాకు
బనిగాదు యింక నీ పాదంబులాన

చ. 1:

అడబాలసతి బోనమారగించు మటంచు
బడి బడిని కడు విన్నపము సేయఁగా
ఉడుగని పరాకుతో నుండి నెచ్చెలి మీఁద
బడలి వొరగినది నీ పాదంబులాన

చ. 2:

అడపంబుపతి వీడెమవధరింపుమటంచు
అడరి కప్పురపుఁ బలుకందీయఁగా
కడకంటఁ జూడదిదె కాఁతాళమో మరపొ
పడఁతి యిప్పుడు నీ పాదంబులాన

చ. 3:

ఆలవట్టము విసరు అతివలను వలదనదు
పాలిండ్లపై కొంగు పచరించదు
యేలాగవునొ వేంకటేశ నీవిపుడిట్టె
పాలించకున్న నీ పాదంబులాన

రేకు: 0004-7 శంకరాభరణం సం: 05-024

పల్లవి:

అలరులు గురియఁగ నాడెనదే
అలకలఁ గులుకుల నలమేల్‌ మంగ

చ. 1:

అరవిరి సొబగుల నతివలు మెచ్చఁగ
అరతెర మరఁగున నాడెనదే
వరుస పూర్వదువాళపు తిరుపుల
హరిఁగరగింపుచు నలమేల్‌ మంగ

చ. 2:

మట్టపు మలపుల మట్టెల కెలపుల
తట్టెడి నడపుల దాఁటెనదే
పెట్టిన వజ్రపు పెండెపు తళుకులు
అట్టిట్టు చిమ్ముచు నలమేల్‌ మంగ

చ. 3:

చిందుల పాటల శిరి పొలయాటల
అందెల మోఁతల నాడెనదే
కందువ తిరువేంకటపతి మెచ్చఁగ
అందపు తిరుపుల నలమేల్‌ మంగ

రేకు: 0004-8 దేశి సం: 05-025

పల్లవి:

వలపారగించవమ్మ వనిత నీ-
యలుక చిత్తమున కాఁకలి సేసినది

చ. 1:

అడియాసలనె పక్వమైన సోయగపు-
వెడయలుకల మంచి వేఁడి వేఁడి రుచులు
ఎడసేసి తాలిమి నెడయించి పైపైనె
పొడమిన తమకంపు బోనము వెట్టినది

చ. 2:

ఆమంచి మధురంపు ఆధరామృతముల
వేమారుఁ దావులు చల్లు వెన్నెలబయటను
కొమలపుఁ దరితీపు కోరికఁ గుమ్మరించి
భామకు పూబానుపు పళ్ళెము వెట్టినది

చ. 3:

కన్నుల కాంక్షలనెడి కళవళములు దీరె
సన్నపు నవ్వులనెడి చనవగ్గలించెను
అన్నువపు మరపు నీ కంతవింతఁ గలిగె నేఁ-
డిన్నియును దిరువేంకటేశుని మన్ననలు