చిరవిభవశతకము

చిరవిభవశతకము

కూచిమంచి తిమ్మన

చ.⁠

సిరిమగఁడున్ బితామహుఁడుఁ జేరి భజింపఁగ వెండికొండపై సరస నవేందుకాంతమణిసౌధమునందుఁ బసిండిగద్దెపై గిరిసుతఁ గూడి వేడుకలఁ గేరెడు నిన్ను మదిన్ దలంచెదన్ చిరవిభవా! భవా! విజితచిత్తభవా! యభవా! మహాభవా!

⁠ 1

చ.⁠

కరులు హరుల్ చమూవరులు గాటపు మేల్‍నగరుల్ కడానిబం గరులు సరుల్ తలోదరులు గంధమిళన్మృగనాభిచందనా గరులు విరుల్ జగాసిరులు గల్గి సుఖింత్రు త్వదీయులౌ నరుల్ చిరవిభవా! భవా! విజితచిత్తభవా! యభవా! మహాభవా!

⁠ 2

చ.⁠

పరమకృపార్ణవా! తుహినపర్వతరాజకుమారికాధవా! వరవృషసైంధవా! కుటిలవైరినిశాటసమిద్ధవా! మనో హరకరసారసాగ్రనిహితాజిగతానతబాంధవా! శివా! చిరవిభవా! భవా! విజితచిత్తభవా! యభవా! మహాభవా!

⁠ 3

చ.⁠

నిరుపమ కూచిమంచికులనీరధిచంద్రుడు గంగమంత్రికిన్ బరమపతివ్రతామణియు భాగ్యసమన్వితయైన లక్ష్మికిన్ వరసుతుఁడై న తిమ్మకవివర్యుఁడ నే శతకం బొనర్చెదన్ చిరవిభవా! భవా! విజితచిత్తభవా! యభవా! మహాభవా!

⁠ 4

చ.⁠

శరనిధి కర్ఘ్యమిచ్చు క్రియ సారసబంధున కారతిచ్చు వై ఖరి నిఖిలాబ్జజాండచయకర్తకు నీకు సమగ్రభక్తి శ్రీ కరముగఁ గోరి యొక్కశతకంబు సమర్పణ సేయఁబూనితిన్ చిరవిభవా! భవా! విజితచిత్తభవా! యభవా! మహాభవా!

⁠ 5

చ.⁠

మరలని భక్తితోడ మును మల్హణబిల్హణముఖ్యసత్కవీ- శ్వరులు కవిత్వవైఖరిని సారెకు నిన్ బ్రణుతించి ధన్యులై బరగిరటంచు నేను నినుఁ బద్యముఖంబుగ సంస్మరించెదన్ చిరవిభవా! భవా! విజితచిత్తభవా! యభవా! మహాభవా!

⁠ 6

చ.⁠

హరిముఖసర్వదిక్పరివృతార్చితపాదసరోజుఁడైన య- క్కరిముఖుఁ డెప్పుడున్ వితతకౌతుకలీలఁ బొసంగఁజేయుఁబో నిరతముగాఁ ద్వదీయపదనీరజభక్తు లొనర్చు సత్కృతుల్ చిరవిభవా! భవా! విజితచిత్తభవా! యభవా! మహాభవా!

⁠ 7

చ.⁠

శరశరదిందుకుందహరిచందనహారతుషారతారకా- దరఘనసారవర్ణ వరదండశుకాంబుజపాణి వాణి యా దరమునఁ బ్రోచుచోఁ గవికదంబము నిన్బ్రణుతించు ధన్యమై చిరవిభవా! భవా! విజితచిత్తభవా! యభవా! మహాభవా!

⁠ 8

చ.⁠

తరలని భక్తి నా హృదయతామరసంబున సంస్మరింతు దు- ర్భరదురితాంధకారవిసరప్రసరన్నళినీసుహృల్లస త్కిరణములైన దెందులురి దివ్యకులోద్భవు లింగనార్యు స ద్గురుచరణంబు లుగ్రభవతోయధిసంతరణంబు లెప్పుడున్ చిరవిభవా! భవా! విజితచిత్తభవా! యభవా! మహాభవా!

⁠ 9

చ.⁠

గురుతరలీలఁ బీఠపురి కుక్కుటలింగమహాప్రభుండవై బరగెడు నిన్ను నేనిపుడు భక్తి దలర్పఁగ నాశ్రయింతు నీ వరకరుణానిరీక్షణము వాలెము నాపయి నిల్పి ప్రోవవే చిరవిభవా! భవా! విజితచిత్తభవా! యభవా! మహాభవా!

⁠ 10

చ.⁠

నరపతి కొక్కకావ్య మిడినన్ ధనధాన్యమణీచోళముల్ పురములు వాహనంబులు విభూషణగోవసుధాదికంబులుం గురుకృప నిచ్చి బ్రోచు నిదిగో మరి నీవిఁక నేమియిచ్చెదో చిరవిభవా! భవా! విజితచిత్తభవా! యభవా! మహాభవా!

⁠ 11

చ.⁠

హర పరమేశ శంకర పురాంతక భర్గ గిరీశ చంద్రశే ఖర మృడ కృత్తివాస శితికంధర శర్వ నగేంద్రజామనో హర శివ మృత్యుసంహర యటంచు నిను న్స్మరియింతు నెప్పుడున్, చిరవిభవా! భవా! విజితచిత్తభవా! యభవా! మహాభవా!

⁠ 12

చ.⁠

కరయుగళంబు మోడ్చి కుతుకంబున మ్రొక్కెద సర్వదేవతా పరివృఢమౌళిభాగ్మకుటపంకజరాగమణిప్రభాచ్ఛటా నిరతవిరాజమానరమణీయభవచ్చరణాగ్రపీఠికిం జిరవిభవా! భవా! విజితచిత్తభవా! యభవా! మహాభవా!

⁠ 13

చ.⁠

తరమె నుతింప నేరికిని దావక దివ్యపదప్రభావమున్ గరికిని సాలెపుర్వునకు గాడుపుదిండికి మోక్షమిచ్చి యా దరమున నేలుకొంటివట దాన వరేణ్యులఁ బ్రోచుటబ్రమా చిరవిభవా! భవా! విజితచిత్తభవా! యభవా! మహాభవా!

⁠ 14

చ.⁠

తరలని భక్తి నెల్లపుడు ధ్యానము సేతు తుషారధారుణీ ధరవరకన్యకావిలసితస్తనకుంభవిలిప్తకుంకుమా గరుఘనసారచందనసుగంధవిభాస్వదురఃస్థలు న్నినున్ జిరవిభవా! భవా! విజితచిత్తభవా! యభవా! మహాభవా!

⁠ 15

{{Telugu poem|type=చ.|lines=

శరధిశయాంబకాయ రవిచంద్రకృపీటభవాంబకాయ గో
పరివృఢకేతనాయ సితపర్వతకూటనికేతనాయ సు
స్థిరకరుణామతే భగవతే శివ తే నమ యంచు మొక్కెదన్
చిరవిభవా! భవా! విజితచిత్తభవా! యభవా! మహాభవా!

|ref=}16}

చ.⁠

సరసిరుహాక్ష పద్మభవ శక్ర కృశానుకృతాంత యామినీ చర వరుణానిలైలబిల చంద్రకిరీట సుధామయూఖ భా స్కరముఖదేవతాప్రముఖసర్వము నీవె యటంచు వేఁడెదన్ చిరవిభవా! భవా! విజితచిత్తభవా! యభవా! మహాభవా!

⁠ 17

చ.⁠

శిరములు వేయిగల్గు నహిశేఖరుఁడైన చతుర్ముఖంబులన్ బరగు విధాతయైన సులభంబుగ నొక్కిసుమంతయైన నీ చరితము లెన్నఁజాలరట శక్తులమే మముబోంట్ల మెన్నఁగాఁ జిరవిభవా! భవా! విజితచిత్తభవా! యభవా! మహాభవా!

⁠ 18

చ.⁠

వరుణభవాత్రిగౌతములు వ్యాసవసిష్ఠఘటోద్భవుల్ పరా శరసుతకణ్వకౌశికులు జహ్నుశమీకముఖాఖిలర్షిశే ఖరులు నుతింపఁజూలరటకా నిను మాదృశు లెన్ననేర్తురే చిరవిభవా! భవా! విజితచిత్తభవా! యభవా! మహాభవా!

⁠ 19

చ.⁠

హరిణము ఢక్క శూలము గజాజిన మెక్కువకన్ను పాపరా సరములు బూదిపూత వినుజక్కర లేనెలపున్క లెద్దు దా నిరుమెయి కప్పు కుత్తుకయు నెమ్మిగఁ గల్గు నిను న్భజించెదన్ చిరవిభవా! భవా! విజితచిత్తభవా! యభవా! మహాభవా!

⁠ 20

చ.⁠

ధరణి రథంబుగా శృతివితానము వాజులుగా రమామనో హరుఁడు శరంబుగా మరుదహార్యము సింగిణిగా బిలేశయే శ్వరుఁడు గుణంబుగా నలువ సారథిగాఁ దిగప్రోళ్లఁ గూల్చితౌ చిరవిభవా! భవా! విజితచిత్తభవా! యభవా! మహాభవా!

⁠ 21

చ.⁠

హరి మిము వేయుపద్మముల నర్చన చేసిన సర్వలోకభీ కరఖరదైత్యసంహరణకారణమై కనుపట్టు చుట్టువా లరుదుగ నిచ్చిమెచ్చి భువనైకధురంధరుఁ జేసి యేలితో చిరవిభవా! భవా! విజితచిత్తభవా! యభవా! మహాభవా!

⁠ 22

చ.⁠

తరణిసుతోగ్రపాశవితతవ్యథ గాసిలి స్వేతుఁ డర్థి నిన్ స్మరణము నొంద నజ్జము వెసం బడదన్ని ధరామరోత్తమున్ గరమనురక్తిఁ బ్రోవవె జగంబున శాశ్వతజీవిఁ జేసి మేల్ చిరవిభవా! భవా! విజితచిత్తభవా! యభవా! మహాభవా!

⁠ 23

చ.⁠

అరుదుగ నింద్రకీలగిరి నర్జునుఁ డుగ్రతపం బొనర్చుచో నరిగి కిరాతరూపమునఁ జక్కఁగ నిల్చి కరంబు వానితో దురమొనరించి మెచ్చి కృపతోడుతఁ బాశుపతాస్త్రమీయవే చిరవిభవా! భవా! విజితచిత్తభవా! యభవా! మహాభవా!

⁠ 24

చ.⁠

సురలును దైత్యులుం గదసి స్రుక్కక వార్ధి మధింపుచున్నచో నురుగతినందు హాలహల ముద్భవమై జగముల్ హరింప న గ్గరళము కంఠసీమనిడి కావవె లోకములెల్ల నాఁదటన్ జిరవిభవా! భవా! విజితచిత్తభవా! యభవా! మహాభవా!

⁠ 25

చ.⁠

కిరికలహంసరూపములఁ గృష్ణుఁడు నంబురుహాసనుండు నీ చరణములున్ శిరంబు గనఁ జాగి రసాతలము న్నభంబు వే సరి వెదుకంగ వారికిఁ బ్రసన్నతనొందవె లింగమూర్తివై చిరవిభవా! భవా! విజితచిత్తభవా! యభవా! మహాభవా!

⁠ 26

చ.⁠

శరధిశయానుఁడైన హరి సారసబంధుకులంబునందు దా శరథి యనం జనించి బహుసంఖ్యలు మీఱిన లింగమూర్తులన్ సరవిఁ బ్రతిష్ఠఁ జేసెనఁట శక్యమె నీ యధికత్వమెన్నఁగాఁ జిరవిభవా! భవా! విజితచిత్తభవా! యభవా! మహాభవా!

⁠ 27

చ.⁠

గరువముతోడ నిన్ను వెలిగా నిడి దక్షుఁడు జన్న మొక్కెడన్ హరిహయపుండరీకనయనాబ్జభవాదులఁ గూర్చి చేయుచో నరుదుగ వీరభద్రభయదాకృతిఁ గైకొని సంహరింపవే చిరవిభవా! భవా! విజితచిత్తభవా! యభవా! మహాభవా!

⁠ 28

చ.⁠

కరమరుదార నల్వఁ దనకన్న ఘనుండగు వేల్పు లేఁడటం చురుగతి దేవతాసభ దురూక్తులు బల్కఁగ నల్గి వాని దు ర్భరతరగర్వభారమును బల్వడిఁ ద్రుంపవె భైరవాకృతిన్ జిరవిభవా! భవా! విజితచిత్తభవా! యభవా! మహాభవా!

⁠ 29

చ.⁠

అరయ మృకండుసూనుఁడు నిరంతరమృత్యుభయాకులార్తుఁడై వెఱవు దలిర్ప నిన్ శరణు వేడిన మిత్తి నడంచి యమ్మునీ శ్వరసుతుఁ బ్రోచినాఁడవట శాశ్వతజీవునిఁ జేసి వాసిగాఁ జిరవిభవా! భవా! విజితచిత్తభవా! యభవా! మహాభవా!

⁠ 30

చ.⁠

ముఱియుచుఁ గాశికాపురిని మూఢత బాహువులెత్తి ధారుణీ ధరములకన్న నెవ్వఁడును దైవము లేడని పల్కు నప్పరా శరసుతు బాహుయుగ్మకము స్తంభనమొందఁగఁ జేసి కుంచవే చిరవిభవా! భవా! విజితచిత్తభవా! యభవా! మహాభవా!

⁠ 31

చ.⁠

అరయ నశేషలోకముల కాఢ్యుఁడ వీవె నిజంబు బాలిశు ల్మెఱమెఱగాఁ దలంత్రు కడిమిం బహిరంతరలోకరక్షకై గరళము కంఠమూలమున గట్టిగ నిల్పు టెఱుంగరేమొకో చిరవిభవా! భవా! విజితచిత్తభవా! యభవా! మహాభవా!

⁠ 32

చ.⁠

హరి నరసింహరూపధరుఁడై సమరాగ్రమహోగ్రభంగి న- బ్బురమొదవన్ హిరణ్యకశిపు న్బరిమార్చి చెలంగుచున్నచో సరగఁ దదుగ్రతం శరభసాళువదేహుఁడవై యడంపవే చిరవిభవా! భవా! విజితచిత్తభవా! యభవా! మహాభవా!

⁠ 33

చ.⁠

సరసవిహారలీల విటజంగమరూపముతోడ నేగి య బ్బురముగ మున్ను భల్లణుని పత్నిని చల్లమదేవిఁ గోరి యా గురుకుచ కౌఁగిట న్నిలవె గోమెలయ న్నెలనాళ్లపట్టివై చిరవిభవా! భవా! విజితచిత్తభవా! యభవా! మహాభవా!

⁠ 34

చ.⁠

ఇరవుగ దారుకావనమునీంద్రవధూతిలకంబుల న్మనో హరవటుకాకృతిం బొలిచి యబ్జశరాహవలీలలం గడున్ గరచిన నీ విలాసరతికౌశలముల్ గణుతింప శక్యమే చిరవిభవా! భవా! విజితచిత్తభవా! యభవా! మహాభవా!

⁠ 35

చ.⁠

సరభసలీల మున్ముసలిజంగమువై చిరితొండనంబి మం దిరమున కేఁగి తత్తనయునిం బొలకై వధియింపఁజేసి చె చ్చెర నిజమూర్తి చూపి కృప చిప్పిల వానిఁ గృతార్థుఁ జేయవే చిరవిభవా! భవా! విజితచిత్తభవా! యభవా! మహాభవా!

⁠ 36

చ.⁠

దొరకొని చెప్పుగాల తలఁ ద్రొక్కి యొకించుక నంజు డెంగిటన్ బొరసిన దప్పనంబొసఁగి పుక్కిటనీ ర్మెయిఁ జిల్కు బోయకున్ సరగున మోక్షమిచ్చితఁట సజ్జనకోటుల కిచ్చు టబ్రమే చిరవిభవా! భవా! విజితచిత్తభవా! యభవా! మహాభవా!

⁠ 37

చ.⁠

ఇరుసతలోకము ల్మహిమ నేలెడు స్వామివి నిన్ను వాకిటన్ దరలకయుండ గాపునిచి ధన్యతఁ జెందిన బాణదైత్యుఁ డే కరణిని నిన్ను మున్నెరవు గ్రాలఁగఁ బూజ యొనర్చెనో కదా చిరవిభవా! భవా! విజితచిత్తభవా! యభవా! మహాభవా!

⁠ 38

చ.⁠

మెరమెర లేక నీవు మును మేదరిసెట్టియు బోయలెంకయున్ బెరసుకులంపు చాకలియు బెట్టిన యోగిర మారగించితౌ సరిసరి నిన్ను నర్చనలు సల్పెడుచో నియమంబులేలయా చిరవిభవా! భవా! విజితచిత్తభవా! యభవా! మహాభవా!

⁠ 39

చ.⁠

పురుడె గణింప భక్తసులభుండవు నీకు నిలింపులెల్ల కి న్నరనరుఁ డెట్టు లర్చన లొనర్చెనొ కాని కడుం గడిందిగా సెరబడి చేసి వానికి విచిత్రధనాధిపతిత్వమివ్వవే చిరవిభవా! భవా! విజితచిత్తభవా! యభవా! మహాభవా!

⁠ 40

చ.⁠

గరళము కంఠమూలమున గట్టిగ దాల్చుట నీకు నంగదల్ బరగునటంచు రుద్రపశుపత్యభిధానుఁ డెదం గలంగఁగా నొరిమెర నంగపీఠమున నుంచవె యాతని శాశ్వతంబుగాఁ చిరవిభవా! భవా! విజితచిత్తభవా! యభవా! మహాభవా!

⁠ 41

చ.⁠

విరసముతోడ నిన్ శిలల వ్రేసియు రోకటఁ గ్రుమ్మియున్ గృహాం తరమునఁ గాపువెట్టియును సిద్ధముగా వెలివెట్టు కుంటిన ల్దిరగఁగఁ జేసినట్టి ఘనులే తగుభక్తవరేణ్యులైరి మేల్ చిరవిభవా! భవా! విజితచిత్తభవా! యభవా! మహాభవా!

⁠ 42

చ.⁠

సురపతి వేణువుం గలిమికొమ్మమగండు మృదంగవాద్య మం బురుహభవుండు తాళమును పొత్తముముత్తవ వీణఁ బూనఁగా హరిసతి బాడినం జదల నద్భుతతాండవకేళి సల్పితౌ చిరవిభవా! భవా! విజితచిత్తభవా! యభవా! మహాభవా!

⁠ 43

చ.⁠

ఉరగము లెమ్ములుం బునుక లుగ్రపిశాచములుం గళాసముల్ గరళము కంఠమూలమున గట్టిగ నెప్పుడు గల్గియుండియున్ బరమశివాకృతిం బొలుచు భద్రములిచ్చెద వబ్బురం బహా చిరవిభవా! భవా! విజితచిత్తభవా! యభవా! మహాభవా!

⁠ 44

చ.⁠

ఇరవుగ నెల్లలోకముల నేలెడు స్వామివి నీవు కూర్మితో దొరతనమెల్లఁ బో కడచి తుచ్ఛపుజాలరిపూపకన్నియన్ శిరమునఁ బెట్టుకొంటివఁట చిత్రములౌర భవద్విలాసముల్ చిరవిభవా! భవా! విజితచిత్తభవా! యభవా! మహాభవా!

⁠ 45

చ.⁠

హరుఁడు మురారి యబ్జభవుఁ డాఢ్యులటంచు పురందరుండు దే వర యనుచు న్విభావసుఁడు వహ్నియు వేల్పులటంచు నెంత్రు బు ద్ధిరహితమానవు ల్పశుపతిత్వము నీయెడఁ గల్గుటెన్నకే చిరవిభవా! భవా! విజితచిత్తభవా! యభవా! మహాభవా!

⁠ 46

చ.⁠

సరవి విధాతరూపమున సర్వచరాచరముల్ సృజించి శ్రీ హరివయి బ్రోదిచేసి నిటలాక్షుఁడవై యడఁగింపుచుందు వ బ్బురముగ నీవెకా జననపోషణనాశనకర్త వారయన్ చిరవిభవా! భవా! విజితచిత్తభవా! యభవా! మహాభవా!

⁠ 47

చ.⁠

శరనిధికన్యనాగ హిమశైలతనూజయనంగ వాణినాఁ బరగు వధూట్లఁ గూడి భవపాలననాశము లోలిఁ జేయుచున్ హరిహరధాతృమూర్తి వగు నాఢ్యు నినుం గనుగొందు నీశ్వరా చిరవిభవా! భవా! విజితచిత్తభవా! యభవా! మహాభవా!

⁠ 48

చ.⁠

పురుషులలోన విప్రుఁడును పుష్పకదంబములోన జాజియున్ దరువులలోన రావియును దానచయంబుల నన్నదానమున్ ధరణిఁ బ్రశస్తిఁ గన్న ప్రియదైవములం దధికుండ వీవయా చిరవిభవా! భవా! విజితచిత్తభవా! యభవా! మహాభవా!

⁠ 54

చ.⁠

పరుసము సోకి లోహము శుభస్థితి బంగరమైన రీతి స ద్గురుకరుణానిరీక్షణ మకుంఠితలీల నొకింత సోకినన్ నరుఁడు మహాత్ముఁడై బుధజనస్తుతుఁడై నినుఁ జెందుఁబో తుదిన్ చిరవిభవా! భవా! విజితచిత్తభవా! యభవా! మహాభవా!

⁠ 55

చ.⁠

అరయఁగ నీరబుద్బుదములట్ల నశించుచునుండు మేనులున్ శరధితరంగమాలికల చందమునం గనుపట్టు ఠీవులు స్థిరమని నమ్మి నిన్గొలువనేరక రిత్త నశింతురౌ ఖలుల్ చిరవిభవా! భవా! విజితచిత్తభవా! యభవా! మహాభవా!

⁠ 56

చ.⁠

పొరిఁబొరిఁ బుణ్యభూములకు బోవఁగనేలఁ గడు న్దపోమహా ధ్వరము లొనర్చనేల యుపవాసములన్ గృశియింపనేటికిన్ హరహర యంచు నొక్కతరి నాడినఁజాలు నఘప్రశాంతికై చిరవిభవా! భవా! విజితచిత్తభవా! యభవా! మహాభవా!

⁠ 57

చ.⁠

తరణిసుధామయూఖవసుధాయజమానసమీరణానలాం బరజలమూర్తివైన నిను భక్తిఁ దలంచినవారి కెందులన్ దిరుగఁగనేల యే శిలల నిచ్చలుఁ గోరి భజింపనేలయా చిరవిభవా! భవా! విజితచిత్తభవా! యభవా! మహాభవా!

⁠ 58

చ.⁠

సరవి చతుశ్రుతు ల్నిఖిలశాస్త్రపురాణకథారహస్యముల్ విరివిగ నిచ్చనిచ్చలును విందుముగాని తలంచిచూడ మా గురుచరణంబులాన నినుఁ గొల్వక యేరికి ముక్తి లేదయా చిరవిభవా! భవా! విజితచిత్తభవా! యభవా! మహాభవా!

⁠ 59

చ.⁠

గరుడముఁ గన్న పన్నగనికాయములట్ల మృగేంద్రుఁ గన్న కుం జరములకైవడిన్ దురితసంఘములెల్లఁ దొలంగి పారుచో నరుఁడొకచో ననాస్థనయినం భవదాహ్వయ ముచ్చరించినన్ చిరవిభవా! భవా! విజితచిత్తభవా! యభవా! మహాభవా!

⁠ 60

చ.⁠

ధరణిసురు న్వధించిన మదంబున గోనిధనంబొనర్చినం గురుసతిఁ గూడినన్ మధువుఁ గ్రోలిన హేమము మ్రుచ్చలించినన్ దొరకొను పాతకంబు లొకతూరి శివా యనినన్ దొలంగుఁబో చిరవిభవా! భవా! విజితచిత్తభవా! యభవా! మహాభవా!

⁠ 61

చ.⁠

గురుహరిణేక్షణామణినిఁ గూడిన దుష్కలుషాత్ముఁ జంద్రునిన్ శిరమునఁ బెట్టుకొంటివఁట చెప్పఁగ నబ్రమయారె మేలుమే ల్గురుతరభక్తితోడ నినుఁ గొల్చినవారి కిఁకేటిపాపముల్ చిరవిభవా! భవా! విజితచిత్తభవా! యభవా! మహాభవా!

⁠ 62

చ.⁠

దురితము లేమిసేయు గ్రహదోషపిశాచరుజామృగోరగో త్కరభయమేల కల్గు నృపతస్కరవహ్నిభయంబులే ప్రియం బెరయు నరుం డొకప్డు నినుఁ బేర్కొని నెమ్మది సంస్మరించినన్ చిరవిభవా! భవా! విజితచిత్తభవా! యభవా! మహాభవా!

⁠ 63

చ.⁠

అరదము లందలంబులు హయంబులు రత్నవిభూషణంబు లం బరములు చామరంబులు ద్విపంబులు నాదిగఁ గల్గు ఠీవులు న్బొరసెడువారు మిమ్ము మునుఁ బూజయొనర్చినవారె కారయా చిరవిభవా! భవా! విజితచిత్తభవా! యభవా! మహాభవా!

⁠ 64

చ.⁠

వెరవిరవార నేపగిది వేఁడినఁ గానియు నియ్యలేని ము ష్కరనరనాయకాధముల సావడులం బడి ప్రేలువారికిన్ నిరతకృపార్ద్రదృష్టిమెయి నీవిడ కన్యుఁ డొసంగఁజాలునే చిరవిభవా! భవా! విజితచిత్తభవా! యభవా! మహాభవా!

⁠ 65

చ.⁠

సరయువు గృష్ణ నర్మదయు జాహ్నవి బాహుద తుంగభద్ర భా స్కరసుతయు న్సరస్వతియు గౌతమియుం మొదలైన దివ్యని ర్ఝరులను మున్గు పుణ్య మొకసారె శివా యనినన్ లభించుఁబో చిరవిభవా! భవా! విజితచిత్తభవా! యభవా! మహాభవా!

⁠ 66

చ.⁠

ధర శ్రుతిమంత్రకోటికిఁ ప్రధానము నాగమమాతయైన య గ్గురుతరమంత్రరాజమునకుం బతి వీవని లోగణింపకే వెకవరి కొల్తురౌ ఖలులు వెంగళులై కుఱకుఱ్ఱవేల్పులన్ చిరవిభవా! భవా! విజితచిత్తభవా! యభవా! మహాభవా!

⁠ 67

చ.⁠

హరువులు దీర్ప నీవు హృదయంబున నెప్పుడు గల్గియుండఁగా వెరవరి యందు నందులకు వేరడులై చనుచుంద్రు పామరుల్ నెరయఁగ వెన్న చేతినిడి నేతికి ద్రిమ్మరు కైవడిం గటా! చిరవిభవా! భవా! విజితచిత్తభవా! యభవా! మహాభవా!

⁠ 68

చ.⁠

ఉరగము గాలిఁ గ్రోలి గుహనుండదె యాకులు నించుకోనల న్దిరుగదె మేఁక నీళ్ల వెనుదీయకఁ గృంకదె కప్ప యెవ్వరే కరణిఁ జరించుచున్న నినుఁ గన్గొనకున్నఁ బరంబు లేదుగా చిరవిభవా! భవా! విజితచిత్తభవా! యభవా! మహాభవా!

⁠ 69

చ.⁠

హరహర! మేరుభూధరమునంత పదార్థము సంగ్రహించిన న్సురనగరాభిపత్యము త్రిశుద్ధిగ నబ్బిన రంభయంత సుం దరి నిజభార్యయైన మది దార్కొను తృష్ణ యడంగదేరికిన్ చిరవిభవా! భవా! విజితచిత్తభవా! యభవా! మహాభవా!

⁠ 70

చ.⁠

బురుదను హాళితో నురెడిపుర్వు మెలంగుచునుండి యెప్పుడు న్బురుద యొకింతయైనఁ దనుఁ బొందకయుండ మెలంగునట్లు నే ర్పరి గృహమేధియయ్యు భవబంధమునంటక నిన్నుఁ జెందుఁబో చిరవిభవా! భవా! విజితచిత్తభవా! యభవా! మహాభవా!

⁠ 71

చ.⁠

ఒరుల భజింపఁబోడుగద యొక్కపుడు న్నినుఁగొల్చు మేటి భా స్వరసరసామ్రభూరుహలసత్కిసలానుభవానుమోదియౌ పరభృతరాజమెందు నొకపట్టున వేములఁ జేరనేర్చునే చిరవిభవా! భవా! విజితచిత్తభవా! యభవా! మహాభవా!

⁠ 72

చ.⁠

సరవిని జీవనార్థముగ చర్మసితాభసితాక్షమాల లే నరుడు ధరించు కైతవమునన్ భువినాతఁ డశేషధారుణీ భరణధురీణప్రచురభాగ్యసమన్వితుఁడై చెలంగుఁబో చిరవిభవా! భవా! విజితచిత్తభవా! యభవా! మహాభవా!

⁠ 73

చ.⁠

సురచిరభక్తితోడ మనుజుం డొక బిల్వదళం బొకప్డు నీ శిరమున నుంచెనేని యది సింధురసైంధవచామరధ్వజాం- బరమణిభూషణాది విభవస్ఫురణ న్గనుపట్టి యుండుఁబో చిరవిభవా! భవా! విజితచిత్తభవా! యభవా! మహాభవా!

⁠ 74

చ.⁠

నరుఁ డొకనాఁడు నీ నగరు నంగనఁ బట్టి విచిత్రఘంటికో త్కరరవమాలకించిన నతండు వినం డెపుడున్ కృతాంతకా సరగళఘంటికావ్రజవిశంకటసాంద్రఘణంఘణధ్వనుల్ చిరవిభవా! భవా! విజితచిత్తభవా! యభవా! మహాభవా!

⁠ 75

చ.⁠

దురదుర జాగి మర్త్యుఁ డొకతూరె సమంచిత తావకీన మం దిరమునకుం బ్రదక్షిణ మతిప్రమదంబునఁ జేసెనేని య ప్పురుషుఁడు శేషభూభువనపోషణధూర్వహుడై విరాజిలున్ చిరవిభవా! భవా! విజితచిత్తభవా! యభవా! మహాభవా!

⁠ 76

చ.⁠

తిరమున నీ నివేశమున దీప మొకానొకనాఁ డొకింత బం- ధురమతి నిడ్డ ధన్యుఁడు చతుర్ముఖముఖ్యనిలింపమాన్యుఁడై నిరుపమ తావకీన పద నిత్యసుఖోన్నతుల చెలంగుఁబో చిరవిభవా! భవా! విజితచిత్తభవా! యభవా! మహాభవా!

⁠ 77

చ.⁠

కరతలతాళవృంతములుఁ గ్రమ్మఁగ నెవ్వఁడు తావకాలయా జిరమున నాఁడు నాతఁడు వసించు విరాజితరాజతావనీ ధరశిఖరాగ్రరత్నసముదంచితకాంచనసౌధవీధులన్ చిరవిభవా! భవా! విజితచిత్తభవా! యభవా! మహాభవా!

⁠ 78

చ.⁠

పరిచితి మీఱ మీ శిరముపై పురిసెండు జలంబొకప్పుఁ డా- దరమునఁ జిల్కు బల్లిదుఁడు తథ్యముగా నఖిలాఘదూరుఁడై ధరఁ గల పుణ్యతీర్థములఁ దప్పకఁ గ్రుంకు ఫలంబుఁ జేకొనున్ చిరవిభవా! భవా! విజితచిత్తభవా! యభవా! మహాభవా!

⁠ 79

చ.⁠

బెరసిన వేడ్క యుల్లమునఁ బిక్కటిల న్మనుజుండు నీకుఁ గొ వ్విరిసరమొక్క టచ్చపువివేకముతోడ నొసంగిన న్బురం దరధరణీరుహప్రసవదామవిభూషితుఁడై చెలంగుఁబో చిరవిభవా! భవా! విజితచిత్తభవా! యభవా! మహాభవా!

⁠ 80

చ.⁠

కరయుగమెత్తి నీకుఁ గుతుకంబున మొక్కునతండు శేషభూ వరమకుటాగ్రరత్నసమవాయసమగ్రవిభాసముల్లస చ్చరణసరోజుఁడై వివిధసంపదలం గొదలేక యుండుఁబో చిరవిభవా! భవా! విజితచిత్తభవా! యభవా! మహాభవా!

⁠ 81

చ.⁠

తొరలెడు భక్తిఁ గప్పురపు ధూపము నీకు జనుం డొసంగుచో గొరగొర వానిమేనఁ గల ఘోరతరాఘపిశాచసంఘముల్ బరువడి కూయి వెట్టుచును బారి చనుంగద తత్క్షణంబునన్ చిరవిభవా! భవా! విజితచిత్తభవా! యభవా! మహాభవా!

⁠ 82

చ.⁠

పరునిఁ బరేశు భక్తజనపాలనశీలు ననంతు నాద్యు న క్షరు నపవర్గదాయకు జగన్మయు నద్వయు నప్రమేయు నం బురుహభవాండభాండపరిపూర్ణపిచండుఁ దలంతు నిన్మదిన్ చిరవిభవా! భవా! విజితచిత్తభవా! యభవా! మహాభవా!

⁠ 83

చ.⁠

హరునకు వందనంబు ఫణిహారునకు న్శరణ్యార్థి దేవతా వరదునకుం జొహారు పురవైరికి మ్రొక్కు నగేంద్రజామనో హరునకు జోత యంచు ననయంబును నీకు నమస్కరించెదన్ చిరవిభవా! భవా! విజితచిత్తభవా! యభవా! మహాభవా!

⁠ 84

చ.⁠

దిరమున స్నానసంధ్యలును దేవ సపర్యలు సువ్రతంబులు న్గురుభజనాదికంబులు నకుంఠితభక్తి నొనర్పనేర నీ చరణము లాశ్రయించితి నిజంబుగ నన్నిక నెట్లు బ్రోచెదో చిరవిభవా! భవా! విజితచిత్తభవా! యభవా! మహాభవా!

⁠ 85

చ.⁠

గురుఁడవు బాంధవుండవు సఖుండవు తల్లివి దండ్రి వన్న వీ శ్వరుఁడవు దాత వాప్తుఁడవు సర్వము నీవె యటంచు నమ్మితి న్వరదుఁడవై కృపారసము వావిరి నాపయిఁ జిల్కి బ్రోవవే చిరవిభవా! భవా! విజితచిత్తభవా! యభవా! మహాభవా!

⁠ 86

చ.⁠

కెరలెడు ఘోరపాపతతికి న్మదిఁ గంపిలి యేయుపాయమున్ దొరకక యొక్క పెన్వెరవు దోచిన నుబ్బుచు నిబ్బరంబుగా హరహర యంచుఁ బల్కితి నహా! దురితంబులు వీడి పారెఁబో చిరవిభవా! భవా! విజితచిత్తభవా! యభవా! మహాభవా!

⁠ 87

చ.⁠

దొరకెను నాకు భాగ్యమున దుస్సహదండధరప్రచండకిం కరపటుదర్పసంహరణకారణమై యయిదక్షరంబులు న్బరగిన మంత్రరాజము సుపర్వులకైనఁ దలంక నేనిఁకన్ చిరవిభవా! భవా! విజితచిత్తభవా! యభవా! మహాభవా!

⁠ 88

చ.⁠

గిరిశ నమోస్తు యోగిజనగేయ నమోస్తు మహోగ్రదోషసం హరణ నమోస్తు భోగికులహార నమోస్తు సమస్తదేవతా చరణ నమోస్తు తే యనుచు సారెకుఁ గోరి నమస్కరించెదన్ చిరవిభవా! భవా! విజితచిత్తభవా! యభవా! మహాభవా!

⁠ 89

చ.⁠

వరద పరాకు భక్తజనవంద్య పరాకు సమస్తపాపసం హరణ పరాకు భక్తనివహావహదక్ష పరాకు యోగిహృ శ్చరణ పరాకు సేయకిఁక సయ్యన నా మనవాలకించవే చిరవిభవా! భవా! విజితచిత్తభవా! యభవా! మహాభవా!

⁠ 90

చ.⁠

పరవనితాపరాస్థనరపాలకసేవలయందుఁ గోరికల్ దొరలఁగనీక నీ చరణతోయజభక్తియు సూనృతోక్తి యె వ్వరికినిఁ గీడు సేయమియు వాలెము నా కొనఁగూర్చి బ్రోవవే చిరవిభవా! భవా! విజితచిత్తభవా! యభవా! మహాభవా!

⁠ 91

చ.⁠

మురిపెముతోడ నక్షుసరము ల్భసితంబు ధరించినాఁడ మ ద్గురువరదత్తమై సకలదోషములన్ దొలఁగించు ద్వాదశా క్షరి జపియించినాఁడ కలుషంబులు నాకిఁకఁ గల్గుటెట్లయా చిరవిభవా! భవా! విజితచిత్తభవా! యభవా! మహాభవా!

⁠ 92

చ.⁠

మురువుగ నక్షమాలయును మోదికఁ బూనితి భూతి దాల్చితిన్ స్మరణగ నైదువర్ణముల మంత్రము వేమరు నుచ్చరించితిన్ దురితపిశాచముల్ దొరగి దూరముగా జనకుండుటెట్లికన్ చిరవిభవా! భవా! విజితచిత్తభవా! యభవా! మహాభవా!

⁠ 93

చ.⁠

గురువరభక్తి మీఱ మిముఁ గొల్చినవాఁడనటంచుఁ దద్దయుం గరువముతోడ నేను కృతకర్మము లెవ్వియుఁ జేయనైతి దు ర్భరదురితాత్ముఁడంచును దిరస్కృతిఁ జేయక నన్నుఁ బ్రోవవే చిరవిభవా! భవా! విజితచిత్తభవా! యభవా! మహాభవా!

⁠ 94

చ.⁠

ఒరిమెఁ గవీంద్రుఁ డేమెఱుఁగునో యని దర్శనమియ్యనోడి బ ల్దొరలును మూలనీగుదురు లోభమున న్నిను నే మఱేమియు న్వరములు వేడ నాకిపుడు వైళము దర్శనమియ్యరాగదే చిరవిభవా! భవా! విజితచిత్తభవా! యభవా! మహాభవా!

⁠ 95

చ.⁠

నర పశు పక్షి వేఁట మృగ నాగ ఝషాదిక జంతుయోనుల న్బొరిఁబొరి నెన్నిమార్లు మును పుట్టితినో యెఱుఁగ న్మహాఘనుల్ హరు నినుఁ గొల్చు భాగ్య మిపుఁ డబ్బెనికే క్రియఁ బ్రోచెదో సుమీ చిరవిభవా! భవా! విజితచిత్తభవా! యభవా! మహాభవా!

⁠ 96

చ.⁠

ఒరుల నుతింపఁజాలఁ గలుషౌఘమహాదహనాగ్నికీలయై బరగుచుఁ గామితార్థము లపారముగా నిడు నీదు నామసం స్మరణ యహర్నిశంబును బ్రశస్తిగ నాకొనరించి బ్రోవవే చిరవిభవా! భవా! విజితచిత్తభవా! యభవా! మహాభవా!

⁠ 97

చ.⁠

కరిముఖ నందిభృంగిరిటికాశిసముద్భవ కాలభైరవా ద్యురు బలవన్మహాప్రమథయోధవరేణ్యులు గొల్వ ధారుణీ- ధరసుతఁ గూడి నాకిపుడు తావక మోహనమూర్తిఁ జూపవే చిరవిభవా! భవా! విజితచిత్తభవా! యభవా! మహాభవా!

⁠ 98

చ.⁠

సరభసలీల నొక్కనిమిషంబును నిన్భజియింపలేక బల్ దెరవుల దుర్విచారములఁ ద్రిమ్మరుచున్నది యెన్ని చెప్పిన న్మరలదు పాపజాతిమతి నాకిపు డంకెము గాదికెట్లయా చిరవిభవా! భవా! విజితచిత్తభవా! యభవా! మహాభవా!

⁠ 99

చ.⁠

అరయఁగ నే నహర్నిశము నాఁడెడు వాక్యములెల్లఁ దావక స్ఫురణగఁ జిత్తగించి కలుషప్రకరంబులఁ బారఁదోలి నీ చరణసరోజభక్తి కొనసాగఁగఁజేపీ సముద్ధరింపవే చిరవిభవా! భవా! విజితచిత్తభవా! యభవా! మహాభవా!

⁠ 100

చ.⁠

ఇరవగు భక్తితోడ జనుఁ డీశతకంబుఁ బఠించిన న్సమా దరమున వ్రాసిన న్వినినఁ దప్పవుగా వివిధేష్టభోగముల్ ధర భుజియించి యా తుదిని తావక దివ్యపదంబుఁ జేరుఁబో చిరవిభవా! భవా! విజితచిత్తభవా! యభవా! మహాభవా!

⁠ 101

సంపూర్ణము.