గ్రంథాలయ సర్వస్వము/సంపుటము 11/సంచిక6/తెనాలి తాలూకా గ్రంథాలయ మహాసభ

తెనాలి తాలూకా గ్రంథాలయ మహాసభ

ఆరవ సమావేశము

రేవేంద్రపాడు

ఒక వైపున నిర్ఘరారావముతో ప్రవహించుచున్న కృష్ణ వేణీ పావనతో యములు కన్నులపండువు సేయుచుండ వటవృక్షచ్ఛాయలు ప్రతినిధులకు స్వాగతమిచ్చుచుండ, ప్రకృతి రామణీయకమగు ఆరుబయలు ప్రదేశమున ౧-౮-3౭ వ తేదీ మధ్యాహ్నము రేవేంద్రపాడు గ్రామములో పైసభ దిగ్విజయముగా జరిగినది. తాలూకాలోని వివిధ గ్రామముల నుండి, గ్రంథాలయ పఠనాలయముల పక్షమునను, వ్యక్తిగతముగను విచ్చేసిన ప్రతినిధులు దాదాపు అరువదిమంది గలరు. కాక చుట్టుపట్టులనుండియు విచ్చేసిన ప్రేక్షకులును, గ్రామస్థులును నాటి రాత్రికి పెదపాలెంలో జరుగనున్న గ్రంథాలయ సంఘప్రతినిధుల యిష్టాగోష్ఠి సమావేశమున కరుగుదెంచిన ముఖ్యులగు గ్రంథాలయ సేవకులును కలసి సభికుల సంఖ్య సుమా రిన్నూరు గలదు. ఇతర తాలూకాల నుండి విచ్చేసిన గ్రంథాలయ సేవకులలో శ్రీ అయ్యంకి వెంకటరమణయ్య గారు, భూపతిరాజు తిరుపతిరాజు గారు, తేతలి సత్యనారాయణమూర్తిగారు, మల్లెల శ్రీరామమూర్తి గారు, మైలా శామ్యుయల్ గారు, వావిలాల గోపాలకృష్ణయ్య గారు ముఖ్యులు.

చుండూరు వాస్తవ్యులగు శ్రీయుత గండవరపు వెంకటేశ్వర్లు గారి ప్రార్ధన సభాకార్యక్రమము ప్రారంభంమాయెను. తరువాత తెనాలి తాలూకా గ్రంథాలయ కార్యదర్శి శ్రీ పాతూరి నాగభూషణంగారు సభకు విచ్చేసిన గ్రంథాలయ సేవకుల నందఱికి నెఱుక పరచిరి.

ఆహ్వాన సంఘాధ్యక్షోపన్యాసము

అనంతరము శ్రీయుత చల్లపల్లి మురహరిరావు గారు మహాసభకు విచ్చేసిన ప్రతినిధులకు ప్రేక్షకులకు స్వాగతమిచ్చిరి.

ప్రారంభోపన్యాసము

అంతట సభాప్రారంభకులగు శ్రీయుత కస్తూరి కుటుంబరావుగారు కరతాళధ్వనుల మధ్యలేచి, తమ యుపన్యాసము నిచ్చిరి.

అధ్యక్షోపన్యాసము

తరువాత శ్రీ పాతూరి నాగభూషణంగారిచే 'ఉపపాదింపబడి, సభికుల కెరుక చేయబడి, మరికొందరు ప్రతి నిధులచే బలపరుపబడిన పిమ్మట శ్రీయుత పుణ్యమూర్తుల రాజశేఖరం గారు అధ్యక్షస్థానము నాక్రమించి, తమ యధ్యక్షాభిభాషణమును జెప్పిరి.

డాక్టరు తేతలి సత్యనారాయణమూర్తి గారు:

పిమ్మట తాడేపల్లిగూడెం తాలూకా గ్రంథాలయ సంఘ కార్యదర్శులగు డాక్టరు తేతలి సత్యనారాయణమూర్తి గారు మనపూర్వపు ఔన్నత్యమును స్మరించి, ప్రస్తుతము మన దేశదుస్థితికి కారణము మనము స్వాతంత్య్రమును గోలు పోవుటే యనియు, తిరిగి మనము స్వాతంత్య్రమును పొందవలెనన్న గ్రంథాలయములు, పఠనాలయములు మిగుల నవసరమనియు, వీనికై సంవత్సర చందాలు సరస్వతీ కట్నముల ద్వారా ధనము సంపాదించవలెననియు మొదలుగా గల సంగతుల జెప్పి చివరకు తాలూకా గ్రంథాలయ సంఘముల విధులను వివరించిరి.

తీర్మానాములు

౧ కీ. శే. వల్లూరి సూర్యనారాయణరావు, తోకల నాగయ్య, విచారపు వెంకటదాసు, సూర్యదేవర రాఘవయ్యచౌదరిగార్ల ఆత్మలకు శాంతి గలుగుటకై యీసభవారు పరమేశ్వరుని ప్ర్రార్ధించుచున్నారు.

౨ తమ చరిత్ర పరిశోధనాపటిమచే మద్రాసు విశ్వకళా పరిషత్తువారి మెప్పుపొంది, పి.హెచ్.డి. బిరుదము బడసిన గుంటూరు హైందవ కళాశాలచారిత్ర కోపన్యాసకులగు డాక్టరు మారేమండ రామారావుగారి నీ సభవారభినందించుచున్నారు.

3 తెనాలి తాలూకా గ్రంథాలయ సంఘము వారు తాలూకాలోని గ్రంథాలయ, పఠనాలయము అన్నిటి నుండి వానియభివృద్ధిని గూర్చిన నెలసరి రిపోర్టులను తెప్పించి అవసరమయినవారికి తగిన సలహాలిచ్చుచు సంవత్సరమున కొక తూరియైన ప్రతి గ్రంథాలయమును పరిశీలించుటకు తగిన యేర్పాట్లు చేయవలసినదిగా ఈసభవారు కోరుచున్నారు.

౪ పడవలో ప్రయాణము చేయు బాటసారుల విసుగుదలను తొలగించి సత్కాలక్షేపమున కనువగు చక్కని యవకాశ మొసగు బోటు గ్రంథాలయముల బ్యాంకు కాలువ పైనడుచు ప్రయాణీకుల పడవలలో స్థాపించిన పెద పాలెము, సేవాశ్రమము వారి నవ్యప్రయత్నము నుగ్గడించుచు తాలూకాలోని యితర ప్రాంతములలోగల యితర కాలువల పైనడచు పడవలందును, నిట్టి గ్రంథాలయములు స్థాపించు ప్రయత్నములు చేయవలసినదిగా తెనాలి తాలూకా గ్రంథాలయ సంఘమువారి నీ సభవారు కోరుచున్నారు.

౫ ఏయుద్యమములో గాని ప్రజాసేవ చేయువారి కేవిధమైన బిరుదులు నొసఁగుట మంచిదిగాదని యీసభ వారు తీర్మానించుచున్నారు.

౬ గ్రంధక ర్తలను, పత్రికాధిపతులను వాని ప్రచురణకర్తలను తమ తమ ప్రచురణముల నుచితముగా తమ గ్రంథాలయముల కిప్పించవలసినదిగా వేడికొనుట గ్రంథాలయ నిర్వాహకులకు ధర్మము కాదని యీ సభవారు తలచుచు బాల్యదశయం దున్న గ్రంథాలయములకు కొంత బలము గలుగువరకు వానికి ప్రోత్సాహము కలిగించు నిమిత్తమై, గ్రంథకర్తలు, పత్రికాధిపతులు, ప్రచురణ కర్తలు తమ తమ ప్రచురములను తాలూకా పట్టణ గ్రంథాలయముల సిఫారసు ననుసరించి కొంత తగ్గింపు రేట్ల కిచ్చుటవసరమని యీ సభవారూహించు చున్నారు.

౭ తెలుగులో వెలువడు నుపయుక్తమగు ప్రతి నూతన గ్రంధమును కొని గ్రంథకర్తలకు ప్రచురణ కర్తలకు తగిన ప్రోత్సాహమిచ్చుచు మాతృభాషాభివృద్ధికి సాయపడవలసినదిగా నీ తాలూకాలోని గ్రంథాలయముల నీ సభవారు హెచ్చరించుచున్నారు.

౮ నేడు విద్వాంసులు, కవులు, గాయకులు, మొదలగువారిని సన్మానించి పోషించు ప్రభువులరుదైన౦దున అభారమును విజ్ఞాన వ్యాపన మాదర్శముగాగల గ్రంథాలయముల నిర్వాహకులు చేయుటవసరమని యీ సభవారభిప్రాయపడు చున్నారు.

౯ ప్రస్తుతస్థితిలో ప్రతియూర నొక సమగ్ర గ్రంథాలయమును స్టాపించి చక్కగా నిర్వహించుట సాధ్యము కాదు కనుక గ్రామ గ్రామమునకు కనీస మొక పఠనాలయమును స్థాపించి ప్రతిఫిర్కాకు నొక కేంద్ర గ్రంథాలయము స్థాపించి నడపుట బాగుండునని యీ సభవారు అభిప్రాయపడుచున్నారు.

౧౦ మన దేశమున ముఖ్యముగా గ్రామములో నివసించు జనులకు మన గ్రంథాలయములు గాని, అవి తెరచియుండు కాలముగాని, అందుబాటులో నుండి విజ్ఞానార్జనకు సరియగు నవకాశములు కల్పించుట కభ్యంతరముగా నున్నందున ప్రతి గ్రామ గ్రంథాలయము నిత్యము రాత్రి వేళల ౨ గంటల కాలము తెరచి యుంచబడి చదువురానివారలకు పుస్తకములను, ముఖ్యముగా పత్రికల చదివి వినిపించుటకై యేర్పాట్లు చేయుటవసరమని యీ సభవారు అభిప్రాయపడుచున్నారు.

౧౧ ప్రచురణ గ్రంథాలయములకును, గ్రంథాలయ సంఘములకును జీవము కనుక ఇప్పటిలో ఆంధ్రదేశములోని వివిధ గ్రంథాలయములును, గ్రంథాలయ సంఘములును వ్యక్తిగతముగ నందునిమిత్త మెక్కువ మొత్తముల వెచ్చింప నసమర్థము లైనందునన తెలుగుపత్రికల యజమానులు విజ్ఞానవ్యాప్తికి దారిజూపి జాతివికాసమునకు తోడ్పడుటలో ప్రాధాన్యము వహించు గ్రంథాలయములకు సంబంధించిన సమాచారములను చక్కగా తమ పత్రికలలో ప్రకటించుచు అప్పుడప్పుడు గ్రంథాలయ క్షేత్రమున గన్పట్టు నూతనోద్యమములు తమ సంపాదకీయములద్వారా నుగ్గడించుచు మధ్యమధ్య నీయుద్యమ వ్యాప్తి విషయమై తమ సలహాలు వెలువరించుచు గ్రంథాలయోద్యమమునెడ తమ ధర్మమును నిర్వర్తించుటకై యీ సభవారు ప్రార్దించుచున్నారు.

౧౨ శ్రీయుత కాళీపట్నం కొండయ్య గారి సంపాదకత్వమున రాజమహేంద్రవరము నుండి ప్రకటింపబడుచున్న “విజ్ఞానం" పత్రికకు యీ సభవారు స్వాగతమిచ్చుచు, ఆధునికయుగమున కవసరములైన ముఖ్యములగు శాస్త్రవిషయములను ప్రత్యేకముగ తెలియజేసెడి యీ నూతన ద్వై మాసపత్రిక నాదరించవలసినదిగా ఆంధ్ర గ్రంథాలయమువారు నీసభవారు కోరుచున్నారు.

౧౩ గ్రంథాలయోద్యమవ్యాప్తికై ప్రారంభింపబడి, ఆర్ధిక చిక్కులకు లోనగుటవలన నితర ఉద్యమముల చేపట్టవలసిన “గ్రంథాలయ సర్వస్వము " యొక్క స్థితికి ఈ సభవారు వగచుచు నిజస్వధర్మనిర్వహణమే ముఖ్యముగా చూచుకొనుటకు సరియైన అవకాశములను కల్పించి స్వస్వరూపముననే బయల్వెడలునట్లు చూచుటకై దీని నిర్వాహకులను ఆంధ్రదేశ మందలి గ్రంథాలయ సేవకులను ఈ సభవారు ప్రార్దించుచున్నారు.

౧౪ ఆంధ్రదేశములోని వివిధ పట్టణ, తాలూకా, జిల్లా, రాష్ట్ర సంఘములు పరస్పర మన్యోన్యాశ్రయముగలిగి యేకలక్ష్యమునకై కృషి యొనర్చుటకు గాను ఆంధ్రదేశ గ్రంథాలయ సంఘము వారి నిబంధనలయందు మార్పులు సూచించుటకై నేడు పెదపాలెములో కూడబోవు గ్రంథాలయ సంఘ ప్రతినిధుల యిష్టాగోష్ఠి సమావేశ ప్రయత్నము నీ సభవారు పూర్ణముగా బలపఱచుచున్నారు.

౧౫ ఆంధ్రదేశ గ్రంథాలయ సంఘమువారు వివిధ విషయములకు సంబంధించిన చక్కని పుస్తకములు తెలుగులో వ్రాయించి ప్రకటించుటచే ఆంధ్ర గ్రంథాలయ ముల కుపయు క్తములైన పుస్తకములు తగినన్నిలేని లోపమును పూర్తిచేయుటకును, విజ్ఞానవ్యాప్తి కుపకరించు పలురకముల కరపత్రము లచ్చొత్తించి ప్రచారము గావించుటకును తాలూకా, పట్టణగ్రంథాలయ సంఘముల సాయముబడయుటకై యీ సభవారు సలహా నిచ్చుచున్నారు.

౧౬ గవర్న మెంటు నిషేధించిన గ్రంధముల జాబితాను సంపాదించి ప్రకటించుటకై శ్రద్ద బూనవలసినదిగా నీసభ వా రాంధ్రదేశ గ్రంథాలయ సంఘము వారిని కోరు చున్నారు.

౧౭ గ్రంథ భాండాగారుల శిక్షణ తరగతుల నేర్పాటు చేసి వానిని ప్రభుత్వము గుర్తించునట్లు ప్రయత్నము చేయవలసినదిగా నీ సభవారాంధ్ర దేశగ్రంథాలయ సంఘము వారి నర్తించుచున్నారు.

౧౮ గ్రంథాలయ బిల్లుయొక్క ఆవశ్యకత నాలోచించి అవసరమగుచో దానిని తయారు చేయుటకు ప్రవీణులగు వివిధ గ్రంథాలయ సంఘ ప్రతినిధులు కొందటి నొక యువ సంఘముగా నేర్పాటు చేయుటకై యీ సభావారాంధ్రదేశ గ్రంథాలయము వారిని కోరుచున్నారు.

౧౯ ఏవైన గ్రంధములను గ్రంథాలయమున కుచితముగా నొసంగదలచువారు దానిని ఆంధ్రదేశ గ్రంథాలయ సంఘమున కప్పగించి గ్రామములో తాలూకా గ్రంథాలయ సంఘములద్వారాను, నగరములలో పట్టణ గ్రంథాలయ సంఘముద్వారాను పంచి పెట్టించుటకై యీ సభవారు కోరుచున్నారు.

౨౦ నూతనముగ మంత్రిత్వ స్వీకరణ మొనరించిన మద్రాసు కాంగ్రెసుమంత్రులు నీసభవారు హృదయ పూర్వకముగ నభినందించి గ్రామోద్ధరణకై యెంతయో యుపకరించు గ్రంథాలయ విషయమున వారత్యంతశ్రద్ధను వహింతురని విశ్వసించుచున్నారు.

౨౧ గ్రంథాలయముల అభివృద్ధి కాటంకముగానున్న

(ఆ) 213 నెంబరు లోకలు బోర్డు సర్క్యులరును రద్దు చేయుటకున్ను,

(అ) 1860 సం॥ 21 వ చట్టప్రకారము గ్రంథాలయములను రిజిస్టరు చేయించుటకు నిర్ణయించిన రు 50 ల రుసుము తీసి వేయుటకున్ను,

(ఇ) రిజిస్టరు చేయబడిన గ్రంథాలయములకు గ్రంథములను కొనుటలో జిల్లా విద్యాశాఖాధికారి యనుమతి యుండవలయునను నియమమును తీసివేయుటకున్ను,

(ఈ) గివర్న మెంటువారిచ్చు గ్రాంటు మొత్తమునకు సరియగు మొత్తమును కొన్ని గ్రంథాలయముల వారు (జిల్లాబోర్డు గ్రంథాలయములు, రిజిస్టర్డు గ్రంథాలయములు) వెచ్చింపవలయునను నియమమును గవర్నమెంటువారిచ్చు గ్రాంటు మొత్తమును కొన్ని కార్యములకు మాత్రమే వెచ్చింపవలయునను నియమము తొలగించుటకున్ను,ఈ సభవారు మద్రాసు ప్రభుత్వమువారి నర్థించుచున్నారు. మీ రాష్ట్ర.

౨౨ గ్రంథాలయముల గ్రాంటుల నిమిత్తమీ రాష్ట్రమున కనీసము లక్షరూపాయలైన ప్రత్యేకించి గ్రంధాలయముల సర్వతోముఖ వికాసమునకై ఆ మొత్తమును వెచ్చించుటలో గ్రంథాలయ నిర్వాహకులకు సంపూర్ణ స్వాతంత్య్రమును ప్రసాదించుట కీ సభవారు మద్రాసు ప్రభుత్వమువారిని ప్రార్థించుచున్నారు.

౨3 మద్యపాన నిషేధమువలెనే నిర్బంధోచిత ప్రాధమిక విద్యనుగూడ నొక జిల్లాలో వెంటనే ప్రారంభంచవలసినదిగా మద్రాసు ప్రభుత్వము వారి నీ సభవారు కోరుచున్నారు.

౨౪ అర గ్రంథాలయ భవన నిర్మాణములకు అర్ధగ్రాంటుల నిప్పించవలసినదిగా మద్రాను ప్రభుత్వము వారి నీ సభవారు కోరుచున్నారు.

౨౬ శ్రీయుత “ఉన్నవ లక్ష్మీనారాయణ పంతులు” గారి "మాలపల్లి" పై నిషేధము తొలగించినందులకు సంతోషమును వెలిబుచ్చుచు తక్కువగల తెలుగు గ్రంధముల పైగల నిషేధమును తొలగించుట కీ సభవారు మద్రాసు ప్రభుత్వము వారిని కోరుచున్నారు.

౨౬ దొరతనము వారిచే ప్రచురింపబడు పారిశ్రామిక ఆరోగ్యవిషయక వ్యవసాయక ప్రచురములను జిల్లా గజెటీలను ఆంధ్రభాష యందు ముద్రింపబడు గ్రంథముల పట్టికలను గ్రంథాలయములన్నిటికిని ఉచితముగా నొసగుటకై ప్రభుత్వమువారి నీ సభవారు వేడుచున్నారు.

౨౭ ఈ సభవారు హిందీ రాష్ట్రభాషగా నుండుట కంగీకరించుచు మాతృభాషయం దన్వయజ్ఞానము కలుగులోపల వేరొక భాషను విద్యార్థులకు నేర్పచూచుట వ్యర్థమనియు హిందీని ౧,౨,3 ఫారములలో నిర్బంధము చేయుటనవసరమనియు తలంచుచున్నారు.

౨౮ మద్రాసు రాష్ట్రమునగల తెలుగు జిల్లాల నన్నిటిని కలిపి ప్రత్యేకాంధ్ర రాష్ట్రముగా నిర్మించుటత్యవసరమని యీ సభవారు తీర్మానించుచు అందులకై వలయు నాందోళన చేయవలసినదిగా ఆంధ్ర దేశీయులను ఆంధ్రరాష్ట్ర కాంగ్రెసు సంఘము వారిని ఆంధ్ర అసెంబ్లీ కౌన్సిలు సభ్యులను ఈసభవారు కోరుచున్నారు.

౨౯ రాయలసీమయని పిలువబడుచున్న కడప, కర్నూలు, బళ్లారి, చిత్తూరు, అనంతపురం జిల్లాలలోని కళాశాలలను ఆంధ్ర విశ్వవిద్యాలయమున వెంటనే చేర్చవలసినదని ఆంధ్ర విశ్వవిద్యాలయాధికారులను మద్రాసు ప్రభు