ప్ర హిన్వానో జనితా రోదస్యో రథో న వాజం సనిష్యన్న్ అయాసీత్ |
ఇన్ద్రం గచ్ఛన్న్ ఆయుధా సంశిశానో విశ్వా వసు హస్తయోర్ ఆదధానః || 9-090-01
అభి త్రిపృష్ఠం వృషణం వయోధామ్ ఆఙ్గూషాణామ్ అవావశన్త వాణీః |
వనా వసానో వరుణో న సిన్ధూన్ వి రత్నధా దయతే వార్యాణి || 9-090-02
శూరగ్రామః సర్వవీరః సహావాఞ్ జేతా పవస్వ సనితా ధనాని |
తిగ్మాయుధః క్షిప్రధన్వా సమత్స్వ్ అషాళ్హః సాహ్వాన్ పృతనాసు శత్రూన్ || 9-090-03
ఉరుగవ్యూతిర్ అభయాని కృణ్వన్ సమీచీనే ఆ పవస్వా పురంధీ |
అపః సిషాసన్న్ ఉషసః స్వర్ గాః సం చిక్రదో మహో అస్మభ్యం వాజాన్ || 9-090-04
మత్సి సోమ వరుణమ్ మత్సి మిత్రమ్ మత్సీన్ద్రమ్ ఇన్దో పవమాన విష్ణుమ్ |
మత్సి శర్ధో మారుతమ్ మత్సి దేవాన్ మత్సి మహామ్ ఇన్ద్రమ్ ఇన్దో మదాయ || 9-090-05
ఏవా రాజేవ క్రతుమాఅమేన విశ్వా ఘనిఘ్నద్ దురితా పవస్వ |
ఇన్దో సూక్తాయ వచసే వయో ధా యూయమ్ పాత స్వస్తిభిః సదా నః || 9-090-06
