అసృగ్రమ్ ఇన్దవః పథా ధర్మన్న్ ఋతస్య సుశ్రియః |
విదానా అస్య యోజనమ్ || 9-007-01
ప్ర ధారా మధ్వో అగ్రియో మహీర్ అపో వి గాహతే |
హవిర్ హవిష్షు వన్ద్యః || 9-007-02
ప్ర యుజో వాచో అగ్రియో వృషావ చక్రదద్ వనే |
సద్మాభి సత్యో అధ్వరః || 9-007-03
పరి యత్ కావ్యా కవిర్ నృమ్ణా వసానో అర్షతి |
స్వర్ వాజీ సిషాసతి || 9-007-04
పవమానో అభి స్పృధో విశో రాజేవ సీదతి |
యద్ ఈమ్ ఋణ్వన్తి వేధసః || 9-007-05
అవ్యో వారే పరి ప్రియో హరిర్ వనేషు సీదతి |
రేభో వనుష్యతే మతీ || 9-007-06
స వాయుమ్ ఇన్ద్రమ్ అశ్వినా సాకమ్ మదేన గచ్ఛతి |
రణా యో అస్య ధర్మభిః || 9-007-07
ఆ మిత్రావరుణా భగమ్ మధ్వః పవన్త ఊర్మయః |
విదానా అస్య శక్మభిః || 9-007-08
అస్మభ్యం రోదసీ రయిమ్ మధ్వో వాజస్య సాతయే |
శ్రవో వసూని సం జితమ్ || 9-007-09
