ఏతే ధావన్తీన్దవః సోమా ఇన్ద్రాయ ఘృష్వయః |
మత్సరాసః స్వర్విదః || 9-021-01
ప్రవృణ్వన్తో అభియుజః సుష్వయే వరివోవిదః |
స్వయం స్తోత్రే వయస్కృతః || 9-021-02
వృథా క్రీళన్త ఇన్దవః సధస్థమ్ అభ్య్ ఏకమ్ ఇత్ |
సిన్ధోర్ ఊర్మా వ్య్ అక్షరన్ || 9-021-03
ఏతే విశ్వాని వార్యా పవమానాస ఆశత |
హితా న సప్తయో రథే || 9-021-04
ఆస్మిన్ పిశఙ్గమ్ ఇన్దవో దధాతా వేనమ్ ఆదిశే |
యో అస్మభ్యమ్ అరావా || 9-021-05
ఋభుర్ న రథ్యం నవం దధాతా కేతమ్ ఆదిశే |
శుక్రాః పవధ్వమ్ అర్ణసా || 9-021-06
ఏత ఉ త్యే అవీవశన్ కాష్ఠాం వాజినో అక్రత |
సతః ప్రాసావిషుర్ మతిమ్ || 9-021-07
