ఆ త్వా గిరో రథీర్ ఇవాస్థుః సుతేషు గిర్వణః |
అభి త్వా సమ్ అనూషతేన్ద్ర వత్సం న మాతరః || 8-095-01
ఆ త్వా శుక్రా అచుచ్యవుః సుతాస ఇన్ద్ర గిర్వణః |
పిబా త్వ్ అస్యాన్ధస ఇన్ద్ర విశ్వాసు తే హితమ్ || 8-095-02
పిబా సోమమ్ మదాయ కమ్ ఇన్ద్ర శ్యేనాభృతం సుతమ్ |
త్వం హి శశ్వతీనామ్ పతీ రాజా విశామ్ అసి || 8-095-03
శ్రుధీ హవం తిరశ్చ్యా ఇన్ద్ర యస్ త్వా సపర్యతి |
సువీర్యస్య గోమతో రాయస్ పూర్ధి మహాఅసి || 8-095-04
ఇన్ద్ర యస్ తే నవీయసీం గిరమ్ మన్ద్రామ్ అజీజనత్ |
చికిత్విన్మనసం ధియమ్ ప్రత్నామ్ ఋతస్య పిప్యుషీమ్ || 8-095-05
తమ్ ఉ ష్టవామ యం గిర ఇన్ద్రమ్ ఉక్థాని వావృధుః |
పురూణ్య్ అస్య పౌంస్యా సిషాసన్తో వనామహే || 8-095-06
ఏతో న్వ్ ఇన్ద్రం స్తవామ శుద్ధం శుద్ధేన సామ్నా |
శుద్ధైర్ ఉక్థైర్ వావృధ్వాంసం శుద్ధ ఆశీర్వాన్ మమత్తు || 8-095-07
ఇన్ద్ర శుద్ధో న ఆ గహి శుద్ధః శుద్ధాభిర్ ఊతిభిః |
శుద్ధో రయిం ని ధారయ శుద్ధో మమద్ధి సోమ్యః || 8-095-08
ఇన్ద్ర శుద్ధో హి నో రయిం శుద్ధో రత్నాని దాశుషే |
శుద్ధో వృత్రాణి జిఘ్నసే శుద్ధో వాజం సిషాససి || 8-095-09
