ప్రో అస్మా ఉపస్తుతిమ్ భరతా యజ్ జుజోషతి |
ఉక్థైర్ ఇన్ద్రస్య మాహినం వయో వర్ధన్తి సోమినో|
భద్రా ఇన్ద్రస్య రాతయః || 8-062-01
అయుజో అసమో నృభిర్ ఏకః కృష్టీర్ అయాస్యః |
పూర్వీర్ అతి ప్ర వావృధే విశ్వా జాతాన్య్ ఓజసా |
భద్రా ఇన్ద్రస్య రాతయః || 8-062-02
అహితేన చిద్ అర్వతా జీరదానుః సిషాసతి |
ప్రవాచ్యమ్ ఇన్ద్ర తత్ తవ వీర్యాణి కరిష్యతో|
భద్రా ఇన్ద్రస్య రాతయః || 8-062-03
ఆ యాహి కృణవామ త ఇన్ద్ర బ్రహ్మాణి వర్ధనా |
యేభిః శవిష్ఠ చాకనో భద్రమ్ ఇహ శ్రవస్యతే |
భద్రా ఇన్ద్రస్య రాతయః || 8-062-04
ధృషతశ్ చిద్ ధృషన్ మనః కృణోషీన్ద్ర యత్ త్వమ్ |
తీవ్రైః సోమైః సపర్యతో నమోభిః ప్రతిభూషతో|
భద్రా ఇన్ద్రస్య రాతయః || 8-062-05
అవ చష్ట ఋచీషమో ऽవతాఇవ మానుషః |
జుష్ట్వీ దక్షస్య సోమినః సఖాయం కృణుతే యుజమ్|
భద్రా ఇన్ద్రస్య రాతయః || 8-062-06
విశ్వే త ఇన్ద్ర వీర్యం దేవా అను క్రతుం దదుః |
భువో విశ్వస్య గోపతిః పురుష్టుత భద్రా ఇన్ద్రస్య రాతయః || 8-062-07
గృణే తద్ ఇన్ద్ర తే శవ ఉపమం దేవతాతయే |
యద్ ధంసి వృత్రమ్ ఓజసా శచీపతే భద్రా ఇన్ద్రస్య రాతయః || 8-062-08
సమనేవ వపుష్యతః కృణవన్ మానుషా యుగా |
విదే తద్ ఇన్ద్రశ్ చేతనమ్ అధ శ్రుతో భద్రా ఇన్ద్రస్య రాతయః || 8-062-09
ఉజ్ జాతమ్ ఇన్ద్ర తే శవ ఉత్ త్వామ్ ఉత్ తవ క్రతుమ్ |
భూరిగో భూరి వావృధుర్ మఘవన్ తవ శర్మణి |
భద్రా ఇన్ద్రస్య రాతయః || 8-062-10
అహం చ త్వం చ వృత్రహన్ సం యుజ్యావ సనిభ్య ఆ |
అరాతీవా చిద్ అద్రివో ऽను నౌ శూర మంసతే |
భద్రా ఇన్ద్రస్య రాతయః || 8-062-11
సత్యమ్ ఇద్ వా ఉ తం వయమ్ ఇన్ద్రం స్తవామ నానృతమ్ |
మహాఅసున్వతో వధో భూరి జ్యోతీంషి సున్వతో |
భద్రా ఇన్ద్రస్య రాతయః || 8-062-12
