ఏన్ద్ర యాహి హరిభిర్ ఉప కణ్వస్య సుష్టుతిమ్ |
దివో అముష్య శాసతో దివం యయ దివావసో || 8-034-01
ఆ త్వా గ్రావా వదన్న్ ఇహ సోమీ ఘోషేణ యచ్ఛతు |
దివో అముష్య శాసతో దివం యయ దివావసో || 8-034-02
అత్రా వి నేమిర్ ఏషామ్ ఉరాం న ధూనుతే వృకః |
దివో అముష్య శాసతో దివం యయ దివావసో || 8-034-03
ఆ త్వా కణ్వా ఇహావసే హవన్తే వాజసాతయే |
దివో అముష్య శాసతో దివం యయ దివావసో || 8-034-04
దధామి తే సుతానాం వృష్ణే న పూర్వపాయ్యమ్ |
దివో అముష్య శాసతో దివం యయ దివావసో || 8-034-05
స్మత్పురంధిర్ న ఆ గహి విశ్వతోధీర్ న ఊతయే |
దివో అముష్య శాసతో దివం యయ దివావసో || 8-034-06
ఆ నో యాహి మహేమతే సహస్రోతే శతామఘ |
దివో అముష్య శాసతో దివం యయ దివావసో || 8-034-07
ఆ త్వా హోతా మనుర్హితో దేవత్రా వక్షద్ ఈడ్యః |
దివో అముష్య శాసతో దివం యయ దివావసో || 8-034-08
ఆ త్వా మదచ్యుతా హరీ శ్యేనమ్ పక్షేవ వక్షతః |
దివో అముష్య శాసతో దివం యయ దివావసో || 8-034-09
ఆ యాహ్య్ అర్య ఆ పరి స్వాహా సోమస్య పీతయే |
దివో అముష్య శాసతో దివం యయ దివావసో || 8-034-10
ఆ నో యాహ్య్ ఉపశ్రుత్య్ ఉక్థేషు రణయా ఇహ |
దివో అముష్య శాసతో దివం యయ దివావసో || 8-034-11
సరూపైర్ ఆ సు నో గహి సమ్భృతైః సమ్భృతాశ్వః |
దివో అముష్య శాసతో దివం యయ దివావసో || 8-034-12
ఆ యాహి పర్వతేభ్యః సముద్రస్యాధి విష్టపః |
దివో అముష్య శాసతో దివం యయ దివావసో || 8-034-13
ఆ నో గవ్యాన్య్ అశ్వ్యా సహస్రా శూర దర్దృహి |
దివో అముష్య శాసతో దివం యయ దివావసో || 8-034-14
ఆ నః సహస్రశో భరాయుతాని శతాని చ |
దివో అముష్య శాసతో దివం యయ దివావసో || 8-034-15
ఆ యద్ ఇన్ద్రశ్ చ దద్వహే సహస్రం వసురోచిషః |
ఓజిష్ఠమ్ అశ్వ్యమ్ పశుమ్ || 8-034-16
య ఋజ్రా వాతరంహసో ऽరుషాసో రఘుష్యదః |
భ్రాజన్తే సూర్యా ఇవ || 8-034-17
పారావతస్య రాతిషు ద్రవచ్చక్రేష్వ్ ఆశుషు |
తిష్ఠం వనస్య మధ్య ఆ || 8-034-18
