ప్ర సమ్రాజం చర్షణీనామ్ ఇన్ద్రం స్తోతా నవ్యం గీర్భిః |
నరం నృషాహమ్ మంహిష్ఠమ్ || 8-016-01
యస్మిన్న్ ఉక్థాని రణ్యన్తి విశ్వాని చ శ్రవస్యా |
అపామ్ అవో న సముద్రే || 8-016-02
తం సుష్టుత్యా వివాసే జ్యేష్ఠరాజమ్ భరే కృత్నుమ్ |
మహో వాజినం సనిభ్యః || 8-016-03
యస్యానూనా గభీరా మదా ఉరవస్ తరుత్రాః |
హర్షుమన్తః శూరసాతౌ || 8-016-04
తమ్ ఇద్ ధనేషు హితేష్వ్ అధివాకాయ హవన్తే |
యేషామ్ ఇన్ద్రస్ తే జయన్తి || 8-016-05
తమ్ ఇచ్ చ్యౌత్నైర్ ఆర్యన్తి తం కృతేభిశ్ చర్షణయః |
ఏష ఇన్ద్రో వరివస్కృత్ || 8-016-06
ఇన్ద్రో బ్రహ్మేన్ద్ర ఋషిర్ ఇన్ద్రః పురూ పురుహూతః |
మహాన్ మహీభిః శచీభిః || 8-016-07
స స్తోమ్యః స హవ్యః సత్యః సత్వా తువికూర్మిః |
ఏకశ్ చిత్ సన్న్ అభిభూతిః || 8-016-08
తమ్ అర్కేభిస్ తం సామభిస్ తం గాయత్రైశ్ చర్షణయః |
ఇన్ద్రం వర్ధన్తి క్షితయః || 8-016-09
ప్రణేతారం వస్యో అచ్ఛా కర్తారం జ్యోతిః సమత్సు |
సాసహ్వాంసం యుధామిత్రాన్ || 8-016-10
స నః పప్రిః పారయాతి స్వస్తి నావా పురుహూతః |
ఇన్ద్రో విశ్వా అతి ద్విషః || 8-016-11
స త్వం న ఇన్ద్ర వాజేభిర్ దశస్యా చ గాతుయా చ |
అచ్ఛా చ నః సుమ్నం నేషి || 8-016-12
