త్వమ్ అగ్నే బృహద్ వయో దధాసి దేవ దాశుషే |
కవిర్ గృహపతిర్ యువా || 8-102-01
స న ఈళానయా సహ దేవాఅగ్నే దువస్యువా |
చికిద్ విభానవ్ ఆ వహ || 8-102-02
త్వయా హ స్విద్ యుజా వయం చోదిష్ఠేన యవిష్ఠ్య |
అభి ష్మో వాజసాతయే || 8-102-03
ఔర్వభృగువచ్ ఛుచిమ్ అప్నవానవద్ ఆ హువే |
అగ్నిం సముద్రవాససమ్ || 8-102-04
హువే వాతస్వనం కవిమ్ పర్జన్యక్రన్ద్యం సహః |
అగ్నిం సముద్రవాససమ్ || 8-102-05
ఆ సవం సవితుర్ యథా భగస్యేవ భుజిం హువే |
అగ్నిం సముద్రవాససమ్ || 8-102-06
అగ్నిం వో వృధన్తమ్ అధ్వరాణామ్ పురూతమమ్ |
అచ్ఛా నప్త్రే సహస్వతే || 8-102-07
అయం యథా న ఆభువత్ త్వష్టా రూపేవ తక్ష్యా |
అస్య క్రత్వా యశస్వతః || 8-102-08
అయం విశ్వా అభి శ్రియో ऽగ్నిర్ దేవేషు పత్యతే |
ఆ వాజైర్ ఉప నో గమత్ || 8-102-09
విశ్వేషామ్ ఇహ స్తుహి హోతౄణాం యశస్తమమ్ |
అగ్నిం యజ్ఞేషు పూర్వ్యమ్ || 8-102-10
శీరమ్ పావకశోచిషం జ్యేష్ఠో యో దమేష్వ్ ఆ |
దీదాయ దీర్ఘశ్రుత్తమః || 8-102-11
తమ్ అర్వన్తం న సానసిం గృణీహి విప్ర శుష్మిణమ్ |
మిత్రం న యాతయజ్జనమ్ || 8-102-12
ఉప త్వా జామయో గిరో దేదిశతీర్ హవిష్కృతః |
వాయోర్ అనీకే అస్థిరన్ || 8-102-13
యస్య త్రిధాత్వ్ అవృతమ్ బర్హిస్ తస్థావ్ అసందినమ్ |
ఆపశ్ చిన్ ని దధా పదమ్ || 8-102-14
పదం దేవస్య మీళ్హుషో ऽనాధృష్టాభిర్ ఊతిభిః |
భద్రా సూర్య ఇవోపదృక్ || 8-102-15
అగ్నే ఘృతస్య ధీతిభిస్ తేపానో దేవ శోచిషా |
ఆ దేవాన్ వక్షి యక్షి చ || 8-102-16
తం త్వాజనన్త మాతరః కవిం దేవాసో అఙ్గిరః |
హవ్యవాహమ్ అమర్త్యమ్ || 8-102-17
ప్రచేతసం త్వా కవే ऽగ్నే దూతం వరేణ్యమ్ |
హవ్యవాహం ని షేదిరే || 8-102-18
నహి మే అస్త్య్ అఘ్న్యా న స్వధితిర్ వనన్వతి |
అథైతాదృగ్ భరామి తే || 8-102-19
యద్ అగ్నే కాని కాని చిద్ ఆ తే దారూణి దధ్మసి |
తా జుషస్వ యవిష్ఠ్య || 8-102-20
యద్ అత్త్య్ ఉపజిహ్వికా యద్ వమ్రో అతిసర్పతి |
సర్వం తద్ అస్తు తే ఘృతమ్ || 8-102-21
అగ్నిమ్ ఇన్ధానో మనసా ధియం సచేత మర్త్యః |
అగ్నిమ్ ఈధే వివస్వభిః || 8-102-22
