సమ్ పూషన్ విదుషా నయ యో అఞ్జసానుశాసతి |
య ఏవేదమ్ ఇతి బ్రవత్ || 6-054-01
సమ్ ఉ పూష్ణా గమేమహి యో గృహాఅభిశాసతి |
ఇమ ఏవేతి చ బ్రవత్ || 6-054-02
పూష్ణశ్ చక్రం న రిష్యతి న కోశో ऽవ పద్యతే |
నో అస్య వ్యథతే పవిః || 6-054-03
యో అస్మై హవిషావిధన్ న తమ్ పూషాపి మృష్యతే |
ప్రథమో విన్దతే వసు || 6-054-04
పూషా గా అన్వ్ ఏతు నః పూషా రక్షత్వ్ అర్వతః |
పూషా వాజం సనోతు నః || 6-054-05
పూషన్న్ అను ప్ర గా ఇహి యజమానస్య సున్వతః |
అస్మాకం స్తువతామ్ ఉత || 6-054-06
మాకిర్ నేశన్ మాకీం రిషన్ మాకీం సం శారి కేవటే |
అథారిష్టాభిర్ ఆ గహి || 6-054-07
శృణ్వన్తమ్ పూషణం వయమ్ ఇర్యమ్ అనష్టవేదసమ్ |
ఈశానం రాయ ఈమహే || 6-054-08
పూషన్ తవ వ్రతే వయం న రిష్యేమ కదా చన |
స్తోతారస్ త ఇహ స్మసి || 6-054-09
పరి పూషా పరస్తాద్ ధస్తం దధాతు దక్షిణమ్ |
పునర్ నో నష్టమ్ ఆజతు || 6-054-10
