వయమ్ ఉ త్వా పథస్ పతే రథం న వాజసాతయే |
ధియే పూషన్న్ అయుజ్మహి || 6-053-01
అభి నో నర్యం వసు వీరమ్ ప్రయతదక్షిణమ్ |
వామం గృహపతిం నయ || 6-053-02
అదిత్సన్తం చిద్ ఆఘృణే పూషన్ దానాయ చోదయ |
పణేశ్ చిద్ వి మ్రదా మనః || 6-053-03
వి పథో వాజసాతయే చినుహి వి మృధో జహి |
సాధన్తామ్ ఉగ్ర నో ధియః || 6-053-04
పరి తృన్ధి పణీనామ్ ఆరయా హృదయా కవే |
అథేమ్ అస్మభ్యం రన్ధయ || 6-053-05
వి పూషన్న్ ఆరయా తుద పణేర్ ఇచ్ఛ హృది ప్రియమ్ |
అథేమ్ అస్మభ్యం రన్ధయ || 6-053-06
ఆ రిఖ కికిరా కృణు పణీనాం హృదయా కవే |
అథేమ్ అస్మభ్యం రన్ధయ || 6-053-07
యామ్ పూషన్ బ్రహ్మచోదనీమ్ ఆరామ్ బిభర్ష్య్ ఆఘృణే |
తయా సమస్య హృదయమ్ ఆ రిఖ కికిరా కృణు || 6-053-08
యా తే అష్ట్రా గోపశాఘృణే పశుసాధనీ |
తస్యాస్ తే సుమ్నమ్ ఈమహే || 6-053-09
ఉత నో గోషణిం ధియమ్ అశ్వసాం వాజసామ్ ఉత |
నృవత్ కృణుహి వీతయే || 6-053-10
