స్వాదుష్ కిలాయమ్ మధుమాఉతాయం తీవ్రః కిలాయం రసవాఉతాయమ్ |
ఉతో న్వ్ అస్య పపివాంసమ్ ఇన్ద్రం న కశ్ చన సహత ఆహవేషు || 6-047-01
అయం స్వాదుర్ ఇహ మదిష్ఠ ఆస యస్యేన్ద్రో వృత్రహత్యే మమాద |
పురూణి యశ్ చ్యౌత్నా శమ్బరస్య వి నవతిం నవ చ దేహ్యో హన్ || 6-047-02
అయమ్ మే పీత ఉద్ ఇయర్తి వాచమ్ అయమ్ మనీషామ్ ఉశతీమ్ అజీగః |
అయం షళ్ ఉర్వీర్ అమిమీత ధీరో న యాభ్యో భువనం కచ్ చనారే || 6-047-03
అయం స యో వరిమాణమ్ పృథివ్యా వర్ష్మాణం దివో అకృణోద్ అయం సః |
అయమ్ పీయూషం తిసృషు ప్రవత్సు సోమో దాధారోర్వ్ అన్తరిక్షమ్ || 6-047-04
అయం విదచ్ చిత్రదృశీకమ్ అర్ణః శుక్రసద్మనామ్ ఉషసామ్ అనీకే |
అయమ్ మహాన్ మహతా స్కమ్భనేనోద్ ద్యామ్ అస్తభ్నాద్ వృషభో మరుత్వాన్ || 6-047-05
ధృషత్ పిబ కలశే సోమమ్ ఇన్ద్ర వృత్రహా శూర సమరే వసూనామ్ |
మాధ్యందినే సవన ఆ వృషస్వ రయిస్థానో రయిమ్ అస్మాసు ధేహి || 6-047-06
ఇన్ద్ర ప్ర ణః పురతేవ పశ్య ప్ర నో నయ ప్రతరం వస్యో అచ్ఛ |
భవా సుపారో అతిపారయో నో భవా సునీతిర్ ఉత వామనీతిః || 6-047-07
ఉరుం నో లోకమ్ అను నేషి విద్వాన్ స్వర్వజ్ జ్యోతిర్ అభయం స్వస్తి |
ఋష్వా త ఇన్ద్ర స్థవిరస్య బాహూ ఉప స్థేయామ శరణా బృహన్తా || 6-047-08
వరిష్ఠే న ఇన్ద్ర వన్ధురే ధా వహిష్ఠయోః శతావన్న్ అశ్వయోర్ ఆ |
ఇషమ్ ఆ వక్షీషాం వర్షిష్ఠామ్ మా నస్ తారీన్ మఘవన్ రాయో అర్యః || 6-047-09
ఇన్ద్ర మృళ మహ్యం జీవాతుమ్ ఇచ్ఛ చోదయ ధియమ్ అయసో న ధారామ్ |
యత్ కిం చాహం త్వాయుర్ ఇదం వదామి తజ్ జుషస్వ కృధి మా దేవవన్తమ్ || 6-047-10
త్రాతారమ్ ఇన్ద్రమ్ అవితారమ్ ఇన్ద్రం హవే-హవే సుహవం శూరమ్ ఇన్ద్రమ్ |
హ్వయామి శక్రమ్ పురుహూతమ్ ఇన్ద్రం స్వస్తి నో మఘవా ధాత్వ్ ఇన్ద్రః || 6-047-11
ఇన్ద్రః సుత్రామా స్వవాఅవోభిః సుమృళీకో భవతు విశ్వవేదాః |
బాధతాం ద్వేషో అభయం కృణోతు సువీర్యస్య పతయః స్యామ || 6-047-12
తస్య వయం సుమతౌ యజ్ఞియస్యాపి భద్రే సౌమనసే స్యామ |
స సుత్రామా స్వవాఇన్ద్రో అస్మే ఆరాచ్ చిద్ ద్వేషః సనుతర్ యుయోతు || 6-047-13
అవ త్వే ఇన్ద్ర ప్రవతో నోర్మిర్ గిరో బ్రహ్మాణి నియుతో ధవన్తే |
ఉరూ న రాధః సవనా పురూణ్య్ అపో గా వజ్రిన్ యువసే సమ్ ఇన్దూన్ || 6-047-14
క ఈం స్తవత్ కః పృణాత్ కో యజాతే యద్ ఉగ్రమ్ ఇన్ మఘవా విశ్వహావేత్ |
పాదావ్ ఇవ ప్రహరన్న్ అన్యమ్-అన్యం కృణోతి పూర్వమ్ అపరం శచీభిః || 6-047-15
శృణ్వే వీర ఉగ్రమ్-ఉగ్రం దమాయన్న్ అన్యమ్-అన్యమ్ అతినేనీయమానః |
ఏధమానద్విళ్ ఉభయస్య రాజా చోష్కూయతే విశ ఇన్ద్రో మనుష్యాన్ || 6-047-16
పరా పూర్వేషాం సఖ్యా వృణక్తి వితర్తురాణో అపరేభిర్ ఏతి |
అనానుభూతీర్ అవధూన్వానః పూర్వీర్ ఇన్ద్రః శరదస్ తర్తరీతి || 6-047-17
రూపం-రూపమ్ ప్రతిరూపో బభూవ తద్ అస్య రూపమ్ ప్రతిచక్షణాయ |
ఇన్ద్రో మాయాభిః పురురూప ఈయతే యుక్తా హ్య్ అస్య హరయః శతా దశ || 6-047-18
యుజానో హరితా రథే భూరి త్వష్టేహ రాజతి |
కో విశ్వాహా ద్విషతః పక్ష ఆసత ఉతాసీనేషు సూరిషు || 6-047-19
అగవ్యూతి క్షేత్రమ్ ఆగన్మ దేవా ఉర్వీ సతీ భూమిర్ అంహూరణాభూత్ |
బృహస్పతే ప్ర చికిత్సా గవిష్టావ్ ఇత్థా సతే జరిత్ర ఇన్ద్ర పన్థామ్ || 6-047-20
దివే-దివే సదృశీర్ అన్యమ్ అర్ధం కృష్ణా అసేధద్ అప సద్మనో జాః |
అహన్ దాసా వృషభో వస్నయన్తోదవ్రజే వర్చినం శమ్బరం చ || 6-047-21
ప్రస్తోక ఇన్ ను రాధసస్ త ఇన్ద్ర దశ కోశయీర్ దశ వాజినో ऽదాత్ |
దివోదాసాద్ అతిథిగ్వస్య రాధః శామ్బరం వసు ప్రత్య్ అగ్రభీష్మ || 6-047-22
దశాశ్వాన్ దశ కోశాన్ దశ వస్త్రాధిభోజనా |
దశో హిరణ్యపిణ్డాన్ దివోదాసాద్ అసానిషమ్ || 6-047-23
దశ రథాన్ ప్రష్టిమతః శతం గా అథర్వభ్యః |
అశ్వథః పాయవే ऽదాత్ || 6-047-24
మహి రాధో విశ్వజన్యం దధానాన్ భరద్వాజాన్ సార్ఞ్జయో అభ్య్ అయష్ట || 6-047-25
వనస్పతే వీడ్వఙ్గో హి భూయా అస్మత్సఖా ప్రతరణః సువీరః |
గోభిః సంనద్ధో అసి వీళయస్వాస్థాతా తే జయతు జేత్వాని || 6-047-26
దివస్ పృథివ్యాః పర్య్ ఓజ ఉద్భృతం వనస్పతిభ్యః పర్య్ ఆభృతం సహః |
అపామ్ ఓజ్మానమ్ పరి గోభిర్ ఆవృతమ్ ఇన్ద్రస్య వజ్రం హవిషా రథం యజ || 6-047-27
ఇన్ద్రస్య వజ్రో మరుతామ్ అనీకమ్ మిత్రస్య గర్భో వరుణస్య నాభిః |
సేమాం నో హవ్యదాతిం జుషాణో దేవ రథ ప్రతి హవ్యా గృభాయ || 6-047-28
ఉప శ్వాసయ పృథివీమ్ ఉత ద్యామ్ పురుత్రా తే మనుతాం విష్ఠితం జగత్ |
స దున్దుభే సజూర్ ఇన్ద్రేణ దేవైర్ దూరాద్ దవీయో అప సేధ శత్రూన్ || 6-047-29
ఆ క్రన్దయ బలమ్ ఓజో న ఆ ధా ని ష్టనిహి దురితా బాధమానః |
అప ప్రోథ దున్దుభే దుచ్ఛునా ఇత ఇన్ద్రస్య ముష్టిర్ అసి వీళయస్వ || 6-047-30
ఆమూర్ అజ ప్రత్యావర్తయేమాః కేతుమద్ దున్దుభిర్ వావదీతి |
సమ్ అశ్వపర్ణాశ్ చరన్తి నో నరో ऽస్మాకమ్ ఇన్ద్ర రథినో జయన్తు || 6-047-31
