నకిర్ ఇన్ద్ర త్వద్ ఉత్తరో న జ్యాయాఅస్తి వృత్రహన్ |
నకిర్ ఏవా యథా త్వమ్ || 4-030-01
సత్రా తే అను కృష్టయో విశ్వా చక్రేవ వావృతుః |
సత్రా మహాఅసి శ్రుతః || 4-030-02
విశ్వే చనేద్ అనా త్వా దేవాస ఇన్ద్ర యుయుధుః |
యద్ అహా నక్తమ్ ఆతిరః || 4-030-03
యత్రోత బాధితేభ్యశ్ చక్రం కుత్సాయ యుధ్యతే |
ముషాయ ఇన్ద్ర సూర్యమ్ || 4-030-04
యత్ర దేవాఋఘాయతో విశ్వాఅయుధ్య ఏక ఇత్ |
త్వమ్ ఇన్ద్ర వనూఅహన్ || 4-030-05
యత్రోత మర్త్యాయ కమ్ అరిణా ఇన్ద్ర సూర్యమ్ |
ప్రావః శచీభిర్ ఏతశమ్ || 4-030-06
కిమ్ ఆద్ ఉతాసి వృత్రహన్ మఘవన్ మన్యుమత్తమః |
అత్రాహ దానుమ్ ఆతిరః || 4-030-07
ఏతద్ ఘేద్ ఉత వీర్యమ్ ఇన్ద్ర చకర్థ పౌంస్యమ్ |
స్త్రియం యద్ దుర్హణాయువం వధీర్ దుహితరం దివః || 4-030-08
దివశ్ చిద్ ఘా దుహితరమ్ మహాన్ మహీయమానామ్ |
ఉషాసమ్ ఇన్ద్ర సమ్ పిణక్ || 4-030-09
అపోషా అనసః సరత్ సమ్పిష్టాద్ అహ బిభ్యుషీ |
ని యత్ సీం శిశ్నథద్ వృషా || 4-030-10
ఏతద్ అస్యా అనః శయే సుసమ్పిష్టం విపాశ్య్ ఆ |
ససార సీమ్ పరావతః || 4-030-11
ఉత సిన్ధుం విబాల్యం వితస్థానామ్ అధి క్షమి |
పరి ష్ఠా ఇన్ద్ర మాయయా || 4-030-12
ఉత శుష్ణస్య ధృష్ణుయా ప్ర మృక్షో అభి వేదనమ్ |
పురో యద్ అస్య సమ్పిణక్ || 4-030-13
ఉత దాసం కౌలితరమ్ బృహతః పర్వతాద్ అధి |
అవాహన్న్ ఇన్ద్ర శమ్బరమ్ || 4-030-14
ఉత దాసస్య వర్చినః సహస్రాణి శతావధీః |
అధి పఞ్చ ప్రధీఇవ || 4-030-15
ఉత త్యమ్ పుత్రమ్ అగ్రువః పరావృక్తం శతక్రతుః |
ఉక్థేష్వ్ ఇన్ద్ర ఆభజత్ || 4-030-16
ఉత త్యా తుర్వశాయదూ అస్నాతారా శచీపతిః |
ఇన్ద్రో విద్వాఅపారయత్ || 4-030-17
ఉత త్యా సద్య ఆర్యా సరయోర్ ఇన్ద్ర పారతః |
అర్ణాచిత్రరథావధీః || 4-030-18
అను ద్వా జహితా నయో ऽన్ధం శ్రోణం చ వృత్రహన్ |
న తత్ తే సుమ్నమ్ అష్టవే || 4-030-19
శతమ్ అశ్మన్మయీనామ్ పురామ్ ఇన్ద్రో వ్య్ ఆస్యత్ |
దివోదాసాయ దాశుషే || 4-030-20
అస్వాపయద్ దభీతయే సహస్రా త్రింశతం హథైః |
దాసానామ్ ఇన్ద్రో మాయయా || 4-030-21
స ఘేద్ ఉతాసి వృత్రహన్ సమాన ఇన్ద్ర గోపతిః |
యస్ తా విశ్వాని చిచ్యుషే || 4-030-22
ఉత నూనం యద్ ఇన్ద్రియం కరిష్యా ఇన్ద్ర పౌంస్యమ్ |
అద్యా నకిష్ టద్ ఆ మినత్ || 4-030-23
వామం-వామం త ఆదురే దేవో దదాత్వ్ అర్యమా |
వామమ్ పూషా వామమ్ భగో వామం దేవః కరూళతీ || 4-030-24
