ఇమా గిర ఆదిత్యేభ్యో ఘృతస్నూః సనాద్ రాజభ్యో జుహ్వా జుహోమి |
శృణోతు మిత్రో అర్యమా భగో నస్ తువిజాతో వరుణో దక్షో అంశః || 2-027-01
ఇమం స్తోమం సక్రతవో మే అద్య మిత్రో అర్యమా వరుణో జుషన్త |
ఆదిత్యాసః శుచయో ధారపూతా అవృజినా అనవద్యా అరిష్టాః || 2-027-02
త ఆదిత్యాస ఉరవో గభీరా అదబ్ధాసో దిప్సన్తో భూర్యక్షాః |
అన్తః పశ్యన్తి వృజినోత సాధు సర్వం రాజభ్యః పరమా చిద్ అన్తి || 2-027-03
ధారయన్త ఆదిత్యాసో జగత్ స్థా దేవా విశ్వస్య భువనస్య గోపాః |
దీర్ఘాధియో రక్షమాణా అసుర్యమ్ ఋతావానశ్ చయమానా ఋణాని || 2-027-04
విద్యామ్ ఆదిత్యా అవసో వో అస్య యద్ అర్యమన్ భయ ఆ చిన్ మయోభు |
యుష్మాకమ్ మిత్రావరుణా ప్రణీతౌ పరి శ్వభ్రేవ దురితాని వృజ్యామ్ || 2-027-05
సుగో హి వో అర్యమన్ మిత్ర పన్థా అనృక్షరో వరుణ సాధుర్ అస్తి |
తేనాదిత్యా అధి వోచతా నో యచ్ఛతా నో దుష్పరిహన్తు శర్మ || 2-027-06
పిపర్తు నో అదితీ రాజపుత్రాతి ద్వేషాంస్య్ అర్యమా సుగేభిః |
బృహన్ మిత్రస్య వరుణస్య శర్మోప స్యామ పురువీరా అరిష్టాః || 2-027-07
తిస్రో భూమీర్ ధారయన్ త్రీఉత ద్యూన్ త్రీణి వ్రతా విదథే అన్తర్ ఏషామ్ |
ఋతేనాదిత్యా మహి వో మహిత్వం తద్ అర్యమన్ వరుణ మిత్ర చారు || 2-027-08
త్రీ రోచనా దివ్యా ధారయన్త హిరణ్యయాః శుచయో ధారపూతాః |
అస్వప్నజో అనిమిషా అదబ్ధా ఉరుశంసా ఋజవే మర్త్యాయ || 2-027-09
త్వం విశ్వేషాం వరుణాసి రాజా యే చ దేవా అసుర యే చ మర్తాః |
శతం నో రాస్వ శరదో విచక్షే ऽశ్యామాయూంషి సుధితాని పూర్వా || 2-027-10
న దక్షిణా వి చికితే న సవ్యా న ప్రాచీనమ్ ఆదిత్యా నోత పశ్చా |
పాక్యా చిద్ వసవో ధీర్యా చిద్ యుష్మానీతో అభయం జ్యోతిర్ అశ్యామ్ || 2-027-11
యో రాజభ్య ఋతనిభ్యో దదాశ యం వర్ధయన్తి పుష్టయశ్ చ నిత్యాః |
స రేవాన్ యాతి ప్రథమో రథేన వసుదావా విదథేషు ప్రశస్తః || 2-027-12
శుచిర్ అపః సూయవసా అదబ్ధ ఉప క్షేతి వృద్ధవయాః సువీరః |
నకిష్ టం ఘ్నన్త్య్ అన్తితో న దూరాద్ య ఆదిత్యానామ్ భవతి ప్రణీతౌ || 2-027-13
అదితే మిత్ర వరుణోత మృళ యద్ వో వయం చకృమా కచ్ చిద్ ఆగః |
ఉర్వ్ అశ్యామ్ అభయం జ్యోతిర్ ఇన్ద్ర మా నో దీర్ఘా అభి నశన్ తమిస్రాః || 2-027-14
ఉభే అస్మై పీపయతః సమీచీ దివో వృష్టిం సుభగో నామ పుష్యన్ |
ఉభా క్షయావ్ ఆజయన్ యాతి పృత్సూభావ్ అర్ధౌ భవతః సాధూ అస్మై || 2-027-15
యా వో మాయా అభిద్రుహే యజత్రాః పాశా ఆదిత్యా రిపవే విచృత్తాః |
అశ్వీవ తాఅతి యేషం రథేనారిష్టా ఉరావ్ ఆ శర్మన్ స్యామ || 2-027-16
మాహమ్ మఘోనో వరుణ ప్రియస్య భూరిదావ్న ఆ విదం శూనమ్ ఆపేః |
మా రాయో రాజన్ సుయమాద్ అవ స్థామ్ బృహద్ వదేమ విదథే సువీరాః || 2-027-17
