తద్ అస్మై నవ్యమ్ అఙ్గిరస్వద్ అర్చత శుష్మా యద్ అస్య ప్రత్నథోదీరతే |
విశ్వా యద్ గోత్రా సహసా పరీవృతా మదే సోమస్య దృంహితాన్య్ ఐరయత్ || 2-017-01
స భూతు యో హ ప్రథమాయ ధాయస ఓజో మిమానో మహిమానమ్ ఆతిరత్ |
శూరో యో యుత్సు తన్వమ్ పరివ్యత శీర్షణి ద్యామ్ మహినా ప్రత్య్ అముఞ్చత || 2-017-02
అధాకృణోః ప్రథమం వీర్యమ్ మహద్ యద్ అస్యాగ్రే బ్రహ్మణా శుష్మమ్ ఐరయః |
రథేష్ఠేన హర్యశ్వేన విచ్యుతాః ప్ర జీరయః సిస్రతే సధ్ర్యక్ పృథక్ || 2-017-03
అధా యో విశ్వా భువనాభి మజ్మనేశానకృత్ ప్రవయా అభ్య్ అవర్ధత |
ఆద్ రోదసీ జ్యోతిషా వహ్నిర్ ఆతనోత్ సీవ్యన్ తమాంసి దుధితా సమ్ అవ్యయత్ || 2-017-04
స ప్రాచీనాన్ పర్వతాన్ దృంహద్ ఓజసాధరాచీనమ్ అకృణోద్ అపామ్ అపః |
అధారయత్ పృథివీం విశ్వధాయసమ్ అస్తభ్నాన్ మాయయా ద్యామ్ అవస్రసః || 2-017-05
సాస్మా అరమ్ బాహుభ్యాం యమ్ పితాకృణోద్ విశ్వస్మాద్ ఆ జనుషో వేదసస్ పరి |
యేనా పృథివ్యాం ని క్రివిం శయధ్యై వజ్రేణ హత్వ్య్ అవృణక్ తువిష్వణిః || 2-017-06
అమాజూర్ ఇవ పిత్రోః సచా సతీ సమానాద్ ఆ సదసస్ త్వామ్ ఇయే భగమ్ |
కృధి ప్రకేతమ్ ఉప మాస్య్ ఆ భర దద్ధి భాగం తన్వో యేన మామహః || 2-017-07
భోజం త్వామ్ ఇన్ద్ర వయం హువేమ దదిష్ ట్వమ్ ఇన్ద్రాపాంసి వాజాన్ |
అవిడ్ఢీన్ద్ర చిత్రయా న ఊతీ కృధి వృషన్న్ ఇన్ద్ర వస్యసో నః || 2-017-08
నూనం సా తే ప్రతి వరం జరిత్రే దుహీయద్ ఇన్ద్ర దక్షిణా మఘోనీ |
శిక్షా స్తోతృభ్యో మాతి ధగ్ భగో నో బృహద్ వదేమ విదథే సువీరాః || 2-017-09
